Les Pages Jèrriaises

Sonnet 40

Take all my loves, my love; yea, take them all

Tchein touos mes tchoeurs, man tchoeu - véthe, prend les touos.
Tch'est qu'tu'éthas don pus qu'chein tu'as ieu dêjà?
Tout 'tait à té, sans atchéthi acouo
Ch't amour, m'n amour, tch'est pus qu'tu méthit'tas.
Si, pouor tan tchoeu, man tchoeu est êchangi
Et fait sèrvi par té, jé n'bliaûm'thai pon.
Mais tout tan mauvaîtchi es'sa maûdit
Si tes mêfaits ont d'shonoré chu don.
J't'extchûthe ta vol'lie, voleux dé man tchoeu,
Ouaithe qué tu'as volé chein tchi n'vaut pus rein.
Les maux d'un tchoeu tchitté, à san tout seu,
Sont piéthes qué les attaques du piéthe enn'mîn.
Ma grâce disgrâcieuse - oh j'sis-t-i' jaloux! -
Mé pèrche lé tchoeu sans m'appréchi nitout.

 

William Shakespeare
Vèrsion Jèrriaise par Geraint Jennings 2001

 

 

Viyiz étout:

 

Les Pages Jèrriaises