Les Pages Jèrriaises

Aéropêtres

Les bliancs aéropêtres graient lus fîns fis en l'air,
filant l'travèrs du bliu des sentes en filots d'souaie
dé bâtisse en bâtisse à nos embliûter l's ièrs.
I' tithent ses fis en nouages, eune ithangnie tchi s'graie
pouor prendre des moûques à pouques, ches peûles dé pâssagièrs
tâssés dans la grise côsse des jets tchi font la crouaix.
Tchi hueûles! Tchi bourdonn'nie! Ches pêtres crouaisent dé travèrs
en filant lus drannets si liain, si cauds, si cliais;
et 'chîn bas dans l'gardîn, les p'tits pêtres dé la tèrre
font tressonner lus fis tchi trélûthent, longs et draits -
un mitheux cratchi d'fielles pouor l's aéropêtres apèrts -
dé l'argent êtithé et filé coumme un trait.
Les bêtes à la bordeûthe êcliaquent à dgi l'adèrt,
coumme l'ithangnie d'à haut, des blianches lîngnes hortes d'êtchèrre.

Geraint Jennings
2013
 

Viyiz étout:

 

Les Pages Jèrriaises