Les Pages Jèrriaises

L'Abbaye d'Westminster

Les grands Angliais sont entèrrés ichîn;
Les piêssants et fanmeurs y trouvent la paix,
Et touos les cheins qu'nou pèrdit en un clyîn
Dg'yi r'posent à tréjous siez les reines et rouais.
Nou trouve les auteurs dans la Carre ès Poètes;
Les hommes dé scienche ont lus p'tite carre étout.
Lus noms duth'thont longtemps sus ches tabliettes,
Stchulptés sus des pliaques rangies patte-à-coue.
Mais, où'est qu'j'avons, nous, not' Parnasse Jèrriais?
J'n'avons dgéthe ni “Panthéon”, ni “Slavín”;
Les Russes, ieux, ont un grand rose mausolée
Pouor exhiber la monmie d'lus Léninne.
Viyant qu' j'n'avons pon d'Abbaye d'Westminster,
Not' Jersey Lily s'trouve à St. Saûveux.

 

Geraint Jennings
Londres, Dézembre 2002


À Paris, les “restes mortels” dé Français fanmeurs sont entèrrés dans l'Panthéon, et à Prague, lé Slavín est l'chînm'tchiéthe nâtional où'est qu'les Tchèques en font d'même pouor lus poètes, musiciens, étc.

Lillie Langtry
 

Viyiz étout:

 

Les Pages Jèrriaises