Les Pages Jèrriaises

Sonnet 19

Devouring time, blunt thou the lion's paws

Temps affanmé! Èrbouffle les grîns ès lions,
Et fai la tèrre d'vouother ses chièrs êfants;
Ès tigres si tèrribl'yes, êrache les grînchons,
Et brûle lé Phénix âgi dans san sang!
S'tembre, Hivé, R'nouvé et Êté - tu couors;
Fai tout ès tchoeurs ès gens en toute saîson -
Qué ch'sait lé bein ou l'ma - tout es'sa hors.
Mais chu crînme-chîn, j'té dis, tu né f'thas pon:
Né hale pon les raies d's années sus sa fache;
N'y'êcris rein d'eune plieunme des ailes du Temps.
Laîsse san bieau vîthage driéthe té coumme tu cache,
Pouor qu'i' sait à tréjous un monûment.
Mais fai d'tan piéthe, vièr Temps, même pus qu'tu'as fait;
Mes lîngnes ont dêjà stchulpté san portrait.


 

William Shakespeare
Vèrsion Jèrriaise par Geraint Jennings 31/12/2001

 

Viyiz étout:

 

Les Pages Jèrriaises