Les Pages Jèrriaises

La veue a d'salleunmé, muchie souos un bouossé

La veue a d'salleunmé, muchie souos un bouossé,
dêteinte dans la nièrcheu, la niet tchée à l'entou;
nou crapaude chîn' et là, n'vait pon la main d'vant sé;
lé ciel enfliube lé monde atout crêpe et nièr v'lous.

Même lé solé n'lit d'aut', à pesta d'leune jé rôde,
enfaûtomé d'ouéthous et souotre mes êmânues;
enhèrmélé dé grîns, aboté d'enhalaûdes,
encafoté acouo, j'y droque, j'y fais trébu.

Né v'là ta sinne dé jeu, et tan solé tchi r'lit;
tes barres du jour m'èrveinnent êcliaithi man matîn,
et jé m'rêvil'ye auve té, et man feu r'est satchi;
tu m'tîthonne coumme d'amor et j'èrsis tout brûlîn.

Ralleunme ma torche, tcheins bouon en as-tu en veurs-tu,
et ma chai s'sa d'la caûffe, j'r'éthai pouor té l'but dû.

Geraint Jennings

 

Viyiz étout:

 

Les Pages Jèrriaises