Les Pages Jèrriaises

Jean Picot - "J.P."

4/2/1846 - 30/12/1922

Né à St. Hélyi, mais d'eune ancienne fanmil'ye Trinnetaise, seul fis dé Jean Picot et Esther, sa femme, née Larbalêtchi (Larbalestier). San péthe avait un commèrce à la carre dé Stopford Road et La Rue ès Dentistes (David Place). Toute chutte contrée-là ava Stopford Road était acouo dans chu temps-là en partie clios et prés. Ch'tait Jean Picot, sr., tchi, êventuellement, suggéthit lé nom d'chutte grand' rue-là, auprès un officyi d'marinne distîndgi du temps, Messire Robert Stopford, et l'nom fut adopté.

Jean Picot, jr., eut s'n êducâtion à l'êcole à Mess Paterson en ville et en profitit hardi, êtant partitchuliéthement bouon en langue Française. I' fut apprenti pouor Charles Benest, bâtisseux d'maîsons, etc., pouor tchique temps mais, n's'y pliaîsant pon trop et san péthe s'étant r'tithé et prîns l'mênage connu souos l'nom d' "Midland House" ès Augrès à La Trinneté, lé janne Picot s'mînt à fèrmer. I' mathyit Ann Le Sueux (Le Sueur), dé La Mathe, eune vaîsinne, et continnuit à fermer eune vîngtaine d'années jusqu'à qu'eune sérieuse accident - la gambe rompue à deux bords - y'arrivîsse et l'înc'modîsse pouor eune affaithe dé dgiex-huit mais. I' louit la fèrme et s'èrtithit, pâssant l'restant d'sa vie trantchilement et dans ses gardîns. Il avait eune passion pouor les fiieurs et i' les craîssait seulement pouor san pliaîsi et pouor ses anmîns.

Jean Picot fut grand lectuthyi et êcrivait hardi, sustout la pus grand' partie d'ses séthées. Mais dé jour étout il éthait souvent prîns du papi et un crèyon d'pliomb pouor faithe note dé chein tchi li crouaîsait l'esprit au moment. Il êcrivît gentiment d'rînmes et d'prose, en Jèrriais et en Angliais, et nou-s-en trouve dans "La Nouvelle Chronique" et s'n Almonas pouor bein d's années.

Parmi ses êcrituthes y'a d'fanmeuses traductions en Jèrriais des vèrsets dé Robert Service (connu comme lé Kipling du Cannada ou l'Barde du Yukon):

Jean Picot traduisit étout "Mrs. Caudle's Curtain Lectures", un livre contenant un tas d'bouonnes histouaithes bein rîsibl'yes.

Quand i' lî v'nait d'l'înspithâtion, i' laissait tout couôrre dans l'gardîn et s'n allait vite en chèrche d'autchun morcé d'papi tchi s'sait d'amain pouor en faithe note. Eune fais il avait même grîffouoilli partout sus ses pouongnets dé c'mînse (emp'sés)! Il êcrivait auve grand soin, ayant eune bouonne connaissance dé la langue Française. Il excellait à traduithe ou à adapter et i' fit, comme nou disait, dé tchi mèrveilleux dans chu genre.

Lé poète Jean Picot était hardi êprîns d'E. J. Luce ("Élie"), autre grand poète Jèrriais, et les deux s'rencontraient souvent au bureau d' "La Nouvelle Chronique" pouor déviser et badinner amicalement ensembl'ye. "J.P." (ch'tait là san nom d'plieunme) avait un grand sens d'humour et pouvait raconter d's histouaithes en mâsse. Ch'est en tchi i' n'cêssait d'faithe plîaisi à ses anmîns, étant un homme hardi bein aimé dé tous.

I' mouothit soudainement lé 30 dé dézembre, 1922 sa femme étant décédée tchiques années d'vant.

 

 

Publié dans les Nouvelles Chroniques du Don Balleine:

 

Les Pages Jèrriaises