Jé n'sais pon tch'es qu'man maître a yieu dernièrement
Mais tchiq'chose dans la gazette l'a fait dire tristément
"Avant - pendant - et après"
Jé sais bein qué ch'est un houmme - jé n'sis qu'un' bête
Mais jé l'ai veu dernièrement sé gratter la tête -
Coumme si n'coumprennnait pon dans bein des cas
Les projets dé nos Messieux dans l's Etats -
Ov lus - avant - pendant et après -
Couôchi ôprès du feu - l'autre Mardi ou Jeudi -
J'èscoutais l'maître grondre et groumâchi -
J'faisais la minne dé ronflyier et dé l'faire en tchan.
Mais jé vint gênè, jé vos l'dirai franchement
Quand jé l'vit bouôgi unn' tchaise
Et paraissant mal à s'en' aîse
I' flianqui la Gazette de côtè et m'fliatti tendrément!
"Chinq ch'lins," s'fit-y, pour un tchan, un digot -
"Ch'est t'y unne forte taxe pour té, man Ponto -
"Si tu'ètais un St.-Bernard ou un Terre Neuvi!
"Eh bein faûdrait, ma fé, les chinq ch'lins payi -
"Man tchan, man tchan, man chier pétit tchan -
"Pour té garder i faudrait payi chinq ch'lins!
"Allons mais jé voudrais saver combein par an
"Les môteurs paient tchi vont par les qu'mins?"
Hè bein, si man maître comprennait lé langage dé tchan
Sa ouass'rie, et un p'tit caûl'ment dé coue
Jé l'y mett'rais bein vite not rèsponse, cliairement
Et persounne né pouôrrait sé fichi dé nous!
Qué les Messieux nos taxent à tant la livre -
Qui nos pèsent (sans frais) au Paids du Rouai -
V'là la manière qu'i dévraient suivre
Comme amendement à la Nouvelle Louai!
Ponto
J.P.
|
