Les Pages Jèrriaises

LE PRUMI TOPPEUR.

Dernièrement, à chein qué j'comprends,
Certains hoummes intelligents
Unn' fais la s'maine sont réunis
Dans un grand Café à Paris,
Pour y dischuter coumment faire
Hounneur deu à la mémoire
Dé certainnes gens qué n'ou n'counnaît pas
Quoiq' n'ou profite dé lus travâs :-
Pouôres Auteurs incounnus,
Inventeurs ov noms perdus,
Qui n'sont pon seul'ment inscrits
Dans les Encyclopédies.
Lé prumi sus lus liste (et ov raison)
A 'taît l'inventeur du tire-bouchon...
Et ils l'ont idèe - à chein qu'nou dit -
Dans tchiq' belle plièche d'èsrigi
A sa mémoire un monument
Fait dé bouteilles vièdes et du chiment !
Mais nos Messieux né s'bornent pas
A honorer seulement les câs
D'inventions respectables,
Utiles et convénables,
Ils l'ont idèe dé s'motchi bein
Des cheinnes qui n'servent dé rein
Et qui n'font qué d'vengi l'monde !
Lé prumi qu'éra don sa ronde
En s'ra yieun qu'à èscappé
Prison, pillôri, et l'gibèt :
Jé pâsle ichin dé l'inventeur
D'unn' affreux chapé : lé Toppeur !
I méritait chounna, lé bûzard,
Achocre, peûle, bâchouart...
Car, poussè par l'Esprit malin,
I s'êmancipit, un biaû matin,
Dans les rues d'Londres dé s'proum'ner
Coîffi d'un tout neu' chapé
Yieun qu'il 'avait fabritchi !
- Ch'tait en 1795, lé 15 Janvi -
La date est juste, n'en doutèz pas,
Notèz-la pour l' Almanâh.
Pour qué châtchun s'en rassouveinne,
Chose pareille en vaût la peinne ;

Eh bein, lé nèz en l'air, tout orghillieux,
Né s'gênant pon si faisait peux
Es gens tchi l'vyiaient ov ditèt,
Not' gueux filait sa route, l'affrontè !
Pourtant les femmes qui l'r'encontraient,
Faisaient un braî, et s'êvannissaient,
Les êsfants étout, filles ou garçons,
Tchyiaient partout en convulsions,
Et y fallut cherchi, en conséquence,
Touôs les docteurs, et l'ambulance!...

En v'là assèz, man conte est fini,
Jé vos l'garentis vrai : fouai d'hounneur,
Mais pensèz tréjous au 15 Janvi,
Quand ou dèshall'rèz vot' Toppeur ! -

 

J. P.

 

Viyiz étout:

 

Les Pages Jèrriaises