Les Pages Jèrriaises

Si Mess Bisson a chinq nièrs c'ats

 

Moussieu lé Rédacteur,

Jé lièsais l'aut' jour dans unn' Gazette Angliaiche qué les rimeurs né faisaient pus dé "triolets," et qué l'habitude s'en perdait. - Pourtchi pon s'y r'mettre? y valent mus qué les Limérick, ma fé - y'ià seul'ment des règles à suivre pour faire un "triolet": y faût qué les 3me, 4me, 5me et 7me lignes riment ensemble - la 2me, 6me, et 8me, et l'affaire est faite - ch'est parce qué la 1ère ligne est erpétée trais fais qué l'entchi sé noumme un "triolet." - Sans vouler mé vanter d'aver réussi, jé vos envie deusse trais:

Si Mess Bisson a chinq nièrs c'ats,
Lé "Prêtro" en est-y don lé père?
Mais chès baloques-là sont célibâts,
Et Mess Bisson a chinq nièrs c'ats!
A les soigni tous yià d'l'embarrâs,
Mais yià des mouaissons dans l'chimtchière,
Si Mess Bisson a chinq nièrs c'ats
J'n'os fichons beins tch'est qu'en est l'père!"

Si l'Député Crill a y'ieu un mulet,
Ch'n'est pon les "By'us" qui l'ont pêtchi.
Ch'est grâce à la Louai pour lé drannèt,
Qué l'Député Crill a y'ieu l'mulet.
Y'ien a qu'éraient voulu qu'y' s'en s'rait engouè
Ou bein qui s'en s'rait en héritchi,
Mais l'Député Crill a mangi l'mulet,
Et n'en a pon 'tait d'pière, à Dieu merci!

Dé Ruisseau ou du Samaritain,
Ov' lus longs vers dans la Chronique,
Tch'est qu'est l'savant, tch'est qui n'sait rein,
Dé Ruisseau ou du Samaritain?
Y s'en baillent là, et bel et bein,
Y'iun dit unn' chose, l'aut' fait sa r'plyique,
Dé Ruisseau ou du Samaritain,
Tch'est qu'est l'savant, tch'est qui n'sait rein?

Si les "By'us" gagnent à la Trin'tè
Dans l'èlection pour Député,
La Mé Rouôge veindra don à sè,
Si les "By'us" gagnent à la Trin'tè.
Y'ieu en Egypte lé temps pâssè,
Merveilles dé faites - tout l'monde lé sait -
Y'ien éra occouo à la Trin'tè
Si les "By'us" gagnent pour Député!..

 

J.P.
1907

 

Viyiz étout:

 

Les Pages Jèrriaises