|
En font-i d'l'oeuvre nos femmes et nos filles, En passent-i du temps à compter lus points, Et ch'est incryiab'ye tchi piles et piles Dé fi d'laine tchi lus passent entre mains! I' fabriquent des caûches, cheintures, corsets, Et des manières dé bounnets d'nyièt, Dé grosses mitainnes, et des blianchèts, Un tâs dé choses pour cachi la fraid. I' s'taient d'mantées, pour un temps, à faire des qu'minses, D'unn' drôle dé faishion, à chein qu'nou dit, Bein maûvaises à mettre, et unn' fais minses, Pas moyien dé l'sôter sans les trillyi! Enfin chounna est tout fait pour abriyier Nos braves soudards tchi s'battent là-bas, Pour les garder un mio cauds ch't'hivé, Et pour faire dé sorte pour qu'i n'enhannent pas. Achet'eu, vous qu'êtes escliaves dé Dame Nicotine, Amateurs dé la pipe, cigare, cigarette, Ou n'mântchis pas dé faire tristre minne Ov unn' blague viède dans vot' pouchette; Là bas, la cheinne au soudard y'i'est presque tréjous, Pour l'i les boutiques né sont pon d'à-main, Et il est souvent longtemps sans aver lé goût D'unn' pipèe dé p'tun quand il en sent l'bésoin. Quand nou pense à chein qu'i faut qu'ils endure: Début jour et nyièt dans tchiq' tranchie, Exposè au temps, à la fraid, mouôillyièture, En dangi à toute minute d'y perdre la vie! Et s'il a la chance dé r'dèshaller d'la d'dans, Lâssè, faillyi, - voire même p't'être à jeun, Trouve t'i aûtchunne chose dé pus ravigottant Qu'unn' cigarette ou qu'unn' pipèe dé p'tun? Ichin lé p'tun n'manque pas, et si j'voulons J'pouvons p'tunner dé n'yièt coumme dé jour, Et i né s'ra vraîment pas dit qué j'laiss'rons Nos braves garçons là-bas être tréjous à court! Eh bein, si les sous s'trouvent, nou peut lus en envier. Et pour chounna, j'sis seûre qué touos les p'tunneurs S'en vont, riches ou pauvres, dé bouan tchoeu dèshaller Lus ch'lins, lus douze sous, voire même lus coppeurs! Novembre 1914 J.P. |
Viyiz étout: