Lé bouais dé vot' niche, ouèqu'ôprès tant d'années,
La tête souôs l'aile, ou dormaîtes sans crainte ou sans gêne,
N'est pus, et jamais, pouôres ouaisiaux, ou né r'trouv'rèz
Votre anmin du temps pâssè, vot' biaû vert chêne!

Nou vos a ôté votre abri en bein maûvais temps,
Quand la fraidure arrive, au c'mench'ment d'l'hivé
Et les branques du coupai ouèqu'ou vos coulaîtes dédans
Veinnent d'être saccagies par la scie et l'serpé.

Jamais nou né r'verra, en êté, tchiq gros mouaisson galant,
Saûticotter dé branque en branque ov sa parchounnière,
Ou, en sortant du nid, lus p'tite famille volant,
Et guettèz d'bein près par lé père et la mère.

Jé n'sis pas surprins d'entendre qu'un bouan vaisin,
Houmme compatissant et plyien dé sympathie,
Si s'affligie entouôre les bouais, n'oublyie pas l'ouais'lin,
Et n'a qué d'en lermer dé les vais dèsnichis.

Enfin, mouaissons villais, èsmigrez, èsmigrez -
Dans les sapins du Parc, y'ià du run pour vous,
Tâchis dé r'touver, d'l'abri, la ouèqu'ou pouôr'rez
Et allèz n'importe yiou - mais pas par sièz-nous!

J.P.
Déc. 1914