Quand l'temps viendra qué les femmes voteront,
Pourront-i l'faire sans aver d'brit?
Ah, ch'est là yieunne des quèstions
A tchi non craint dé rèspondre "Oui"....

La chose en amend'ra-t-alle
Quand les femmes voteront?
Car si toutes qu'ont vouaie deshallent
Les hoummes, yieux, ouè qu'ils en s'ront?

Eh, l'houmme lé pus trantchille,
Dans unn' forte êlection,
Trouve qué ch'est tàche difficile,
Dé n'y pas perdre la raison!

Mais ov des femmes raide animées
Dans l's'affaires dé lus parti,
Pouôres hoummes, tch'est don qu'ou f'rèz,
Si ch'est qu'i veinnent à sé mârri?

Pour vous, ou s'rez dans l'embarràs
Si vos contré partisannes
Entouôre vous né sé bornent pas
Es moqu'ries ou ès picagnes!

Faûdra vos mèsfier dé lus griffes,
Et dé n'jamais oubliyier
Qu'en dounnant paffes ou mornif'yes,
Y peuvent étout grimmer!

Les moqueurs en font des riselées,
Dé drôles dé contes, ont des visions
Dé portraits d'hoummes bein embêtès
Par tchiq' femmes ès èslections.

L'aut' jour unn' Gazette v'nant d'Amérique
En touôr' les faib'yesses du sexe féminin,
Avait un portrait d'unn' scène tragique,
Et tchi fait peux pour lé temps à v'nin...

Ch'en 'tait yieun bein fait pour montrer
Qué pour aidji à san candidat,
Unn' femme entêtèe ira voter,
N'importe dans tch'il êtat!

Nou s'y vait endrait un grand bâtisse
Un tas d'voteurs, hoummes et femmes, mâtès,
Gardèz en ordre par la police,
Attendant lé mot: "Ch'est vot'tou', entrèz."

Mais la vot'rie né va pas assèz rond'ment
Du mains un' houmme qu'est là lé crait,
Et i dit en groumâchant à un agent:-
"I s'ra don naire nièt quand jé voterai!"

"Là d'sus, s'fit l'autre, jé n'peux rein dire,
"Mais vot' tou' veindra peut-être dévant,
Pourvu,"...et l'houmme en b'yiu s'èsgouffe à rire,
"Pourvu qu'i n'arrive pon d'aûtres accidents!"

"I paraît qué là-haût dans la Salle,
"- Jé veins d'en oui' les nouvelles -
"Unn' femme en votant, a 'tait prinse mal,
"Et y'i'à qu'nou dit... des jumelles!"