Il' est bein r'counnu qu'à garçon ou fille
La police a tous défend
Dé bouler lus cerc'yes par les rues d'la ville
Pour êviter tchiq' accident -
Si dans un' engin d'chu calibre là
Un pâssant sé trouve enhermélè
I n'en êscapp'ra pon sans aver d'ma,
Enviè à quat' pattes sus l'pavè!
I n'y'ia pus d'dangi d'être aveûg'yis
Par dé pétits individus
Tchi fliantchaient partout sans y prendre avis
Lus "tip cat" ove les buts pointus -
Ch'est des minsères du temps passè
Grâce ès gardjiens d'la sèur'tè publique.
Faût don à tous lus en saver bouan grè
Police en b'yu ou honorifique?
Achet'eu quand nou's proumenne par les qu'mins
Et qué nou risque d'être èscrâsès
Par automobiles ou d'autres engins?
Faut-y s'en gêner, être èsnervès?
Séyiz au mains ercounnaissants
Et qué pour seûre justice sait faite
A toutes chès braves et hounnêtes gens
Qu'ont aboli l'cercle et lé "tip cat"!
J.P.
| 