|
Sortant d'hopita', un Soudard qu'avait 'tè bliessè, Ervisit lé village ouèqu'i l'avait 'tè nè, Et là i' fut r'chu à bras ouverts Par parents et ammins, jannes et viers. Pour yieûx i' n's'enn'yiaient jamais dé l'ouï Dans touôs temps lus faire lé r'cit Dé chein qu'il avait fait ou avait veu Là-bas dans les tranchies ou souôs l'feu. Et i s'plaîsait à conter à chès braves gens Des scènes qui n'avaient qué d'lus touôner les sens! "Ou z'avèz souvent lu," i' lus dîsait, "sus la Gazette, "Entouôre lé saccage qué j'faîsons ov la baïonnette, "Eh bein, unn' nièt, qué jamais jé n'oublyierai "Unn' nièt qué nou n'viyiait pon la main dévant sai, "Jé tchîmes sus l'dos ès Boches sans tirer un coup, "Et ch'tait pique ichin, pique là, et pique partout! "Les peûles hourlaient quand la baïonnette les touchait la couenne "Et d'un seul coup j'en eût deux d'enfilés sus l'but d'la meinne." - "Mais, dé nièt, coumm'est qué tu savais qué tu'en t'nais deux?" L'y d'mandit un vieux, d'un ton bein sérieux. - "Oh, pour chonnna," s'fît l'aûtre, "j'n'avais pon bésoin d'y vais, "J'enn'tais bein seûre, ma fingre, seulement par lé paids, "Et pis j'entendit-y pon lé numéro deux dire au numéro yieun. - "Allons, amonte don pus haût, pour mé faire du run!"
J. P.
|
Viyiz étout: