|
Chétait un bouan fermi qué l'vaîsin Mait' Pierre, Ses r'coltes craissaient tréjoûs à veue d'yi; Y graissait bein, serclyiait bein, soignait bein sa terre, Et y savait êtout coumment la travaillyi. San vaîsin, Mait' Jacques, sé pliaignait tréjoûs, "Pas d'chance!" - ch'tait là souvent sa r'merque - "Quand jé qu'menche à dèsfoui, ch'est à tren' sièz sous, Et mes patates né font qué quat' cabots la perque! Pour lé vaîsin Piérro, tout l'y craît souôs la main, Y ramasse des sous et les met à la Banque, San froment touôs l's ans, est pus bé qué l'mein, Et châque brin germe, quand lé mein manque. Et pourtant jé prie lé Seigneur tout l'temps Dé faite craître chein qué j'sème dans mes clios, Et à forche dé prier, jé vos l'asseûre, bouannes gens, Qué mes g'nors sont èscorchis quâsi jusqu'ès os. Lé couôrage m'èscappe, j'nai pus d'envie d'prier, Y'm semble qué mes prières n'aboutissent à rein, Maît Pierre, l'y, prie-t'y? prie t'y autant coumme mé? J'en doute, mais enfin, jé l'y d'mand'rai démain..." Lé jour en r'vénant y rencontre san vaîsin, Et ov unn' fache longue coumme unn' pièrre dé hêche, Y l'y conte toute sa peine et tout san chagrin. Pierre trantchill'ment l'èscoute, et tout d'un coup s'erdresshe. Et y l'y dît d'un ton tout-à-fait sérieux: "Quand jé prie, Mait' Jacque, ch'est souvent en bas, Nou peut, sans s'en vanter, être bein réligieux - Mais si tu n'fais qué prier, tch'est qui soigne au travâs? Il est bon dé prier, mais pas tréjoûs à g'nors, Nou peut lé faire assi bein dé d'but, Lé Seigneur nos entend si jé soummes déhors, Voire, maîme quand nou z'est a travaillyi du. Oui, prie man vaîsin, - mais soigne étou ta terre, Jâmais sercle n'a 'tait tuèe par prières seulement, Prends ta houette en main, fais-y tréjoûs la guerre, Et tu'éras dé belles rachinnes, et dé bouon froment. Prends couôrage, Mait' Jacques, fait servir tes bras, Travaille du dans tes clios - advienne que pourra - Mais dévant tout, l'ammin, surtout n'oublyie pas Lé bouan dit-on: 'Aide toi, et les Ciel t'aidera!'" JP 1908 |
Viyiz étout: