|
Quand jé s'rai unn' houmme, jamais ou né m'verrèz Alentou dé man co', Dîmanche ou sus s'maine, Unn' djiène haute coumme chounna, et tell'ment emp'zèe Qu'ou s'ra stiff coumme lé bord d'un moyien saucepan. Et ma moustache ni n'tout n'éra pon les buts pointus, Pour ersemblyier à unn' hat-pin à fille, Ni jé n'pâss'rai pon man temps à haller dessus, Ou à la pliâtrer of chire ou huile - Chein qué j'vos conte ch'est la pure véritè, Quand jé s'rai un' houmme, jé n'frai pon ditèt! Quand jé s'rai un' houmme, j'm'habill'rai à man goût, Ou vèrrèz coumme jé s'rai grais lé Samedi l'arlévèe! Ah ch'est qué les filles aîment à s'appréchi d'vous, Quand nou sort dé sièz Dubras ov' les qu'veux parfumès! Et jé s'rai à la mode, ov' gants d'Kid, un pince-nèz, Des bottes en paytint, câsaque bein bringie, Et en m'proumm'nant, si ou z'êtes à ma vaie, Ché s'ra: "Carr'ous qué j'passe!" j'vos l'garantie! Voire djià, criyiz-mé, jé m'habbill'rai bein, Quand jé s'rai un' houmme - si jen ai l'moyien! Quand jé s'rai un' houmme, j'cré bein dans tchiq' temps Lé malheur mé pouss'ra à mé faire marier, Car ach't'eu, ou viyiz, (et jé n'ai qué treize ans) Les filles font tout chein qui veulent ov mé. Eh bein, quand jé s'rai un' houmme ov' des sous d'côtè, Jé gage qué tchiq' femme s'ra seûre dé v'nin Et dé m'entraîner à l'Eglyise ou jé s'rai mariè Dévant qué j'piesse l'y dire un "oui" ou "nennin"! Et i m' sra bein du, ch'est mé qui vos l'dit, Quand jé s'rai un' houmme, d'être dé maîme servi! Quand jé s'rai un' houmme, jé s'rai vier garçon, Pas d'femme à m'embêter, à despenser man bein, Jé veurs rester trantchille, maître dans ma maison, Et jé vos asseûre qui n'y manq'ra dé rein. Quand tchiq' ammin veindra mé vais au sai, Jé restérons début, si l'faût, jusqu'à minniet, Sans entendre unn' vouaie aigre du haût des d'grès criyer: "Tom, est-che qué tu n'veindras pon té caôchi annièt?" Et ou viyiz, bouann's gens, qué j'érai raison, Quand jé s'rai un' houmme, d'être vier garçon! Quand jé s'rai un' houmme, mé dir'ous tch'est qué j'frai? Vraîment jé n'ai pon fait d'plians pour lé temps à v'nin, Tel qué l'temps veindra, tel jé l'prendrai, Et jé n'en mouôrra jâmais, jé l'espêre, dé chagrin. Yià tréjous dans la vie des désappoint'ments, Mais faût lus faire fache ov' bouann' minnes, Et nou l's oublyiera bétôt, est-che pon, bouann's gens? Faut mus en rire, qué d'en faire des grinnes? Eh bein, unn' vie paîsible, pour mé, pour vous, Esfant ou houmme, jé vos la souhaite à tous! JP |
Viyiz étout: