|
"Le conte est vrai Et digne dé fouai" "Coumment qu'ou z'êtes, annièt, Mait' Jos?" Dît l'ammin Ph'lippe a unn' pratique Tchi, ambiounnant et en rondissant l'dos Entrait un samedi dans sa boutique. "Hon," s'fît lé vieux en s'assiévant Sus unn' tchaise ôprès l'compteux - "Hon, hon," s'fît-y en sé frottant Pas seul'ment unn' gambe, mais les deux;- "Jé sis couôsu dé roumatisse, J'n'ai dé r'pos ni jour ni niet, Pout té, Man Ph'lippe, bouan Djieu t'bénisse, Et té prêserve d'aver ditèt - " "Mercie pour lé souhaît," rèspounnit l'ammin, "Mais y'ià t'y pon r'miède pour chounna? Sé frotter les gambes ov' dé l'esprit d'vin Ou bein tchiq'chose tchi vos rèscauffra?" "Mé rescauffer? et, ma fingre, j'en sue Quand l'fichu rhoumatisse mé digotte, Dé tchi fraid y vaûdrait bein mus, Et pour prendre des drogues, djiantre, j'm'en botte!" "Eh bein, jé n'sis pon apotitchi" (Not' Ph'lippe était un grand farceûx) "Mais jé voudrais vos soulagi," Sé fit-y à Mait' Jos d'un ton sérieûx: "Jé n'vends pon dé drogues, mais j'ai d'l'onguent Tchi né vos trall'ra don pas la pé - Sus vos gambes frottèz-en gentiment Dévant vos couler au lièt lé sai - En v'là unn' "tinnèe" - je vos en fais présent." Ph'lippe savait beinm car y faût vos l'dire; Qué Jos né pouvait ni lière ni èscrire. L'Ammin avait oublyiè entouôre Mait' Jos, Et l'onguent qui y'iavait dounnè Quand y'l'tait v'nu l'Samedi pâssè. Mais v'là t'y pon qué l'préchain Samedi Ph'lippe lé vit qu'entrait dans sa boutique, Sé r'dresshant coumme tout rajeunni Et prêt à faire dé la gymnastique! "Ah, l'ammin Ph'lippe, jé veins té r'mercié Pour t'enn' onguent merveillieux, Y nos a guéris, la bouann'femme et mé, Et j'n'os en soummes frottès touos les deux Vend m'en, jé t'en prie, unn' aut' 'tinnèe', Car j'l'avons trouvès diversément bon, Et si l'rhoumatisse nos venge unn' aut' bordèe, J'voulons en garder dans la maison!" Et l'ammin Ph'lippe y'ièn vendit Pas seul'ment yieunne, mais six, Et pour lé lot Mait' Jos payi La soumme dé douze sous - ch'tait là l'prix! Ov lé farceux j'avons ri bein souvent, Ou l'érêtes fait étout si ou l'avêtes entendu, Quand y contait pour Mait' Jos et s'n onguent, Car ch'tait du "biâtchin" qui y'iavait vendu! JP 1907 |
Viyiz étout: