Jé m'rassouvins si bein, quand pour la prumié fais
Jé tchitti mes p'tits cottillyions pour mettre des braies;
J'sais bein qu'i n'mé v'naient qu'au g'nou - achatées a "be-guess"
Il's taient tinses à haût par unn' parre dé "guéless."
Mais à sièz ans nou' n's'gêne pon si des braies sont bein faîtes
Pour vu qu'nou trouve ès côtès deux belles pétites pouchettes.
Aver des braies ov des pouchettes! ah, jé m'cryiais t'y grand
Quand en route pour l'Escolle jé coulais mes mains d'dans;
Jé m'en r'dresshais tout fi - j'en avais bein du "fun,"
Jé n'irais pus ov les "Infants," - jé s'rais dans "Standard One," -
Dans yieunne ma mèthe mint man mouôchét, dans l'aûtre des galettes
Pour mangi à "lunch-time" - il's 'taient p'yiennes, mes pouchettes!
Des knicker bocquers font bein assèz quand-y qu'nou z'est touô p'tits.
Mais quand un garçon craît, et qu'il a pus d'avis
I l'y faût tchiq'chose dé pus long pour couvri ses djèrrêts,
Et qué ses pouchettes grandissent ossi bein qué ses braies!
Jé n'soummes pon coumme les filles - pour y'ieûx, deusse-treis rouôlettes
Dé fi pour lus crochett'ie rempient vite lus pouchettes!
Mais pour nous garçons, y'ioù mettre nos marbres, "tip-cat" ov buts pointus,
Nos toupins, nos ficelles, not' rigolisse, chucrins à mié fondus,
Nos poummes, nos châtaignes, nos oranges, codrettes ou nouaîx,
Nos balles, nos èslingues, cannoûnières, brioches désafillées,
Et un tâs d'autres choses qué j'voulons garder nettes,
Y'ioù don les mettre toutes, sinon dans nos pouchettes?
N'allèz pon cherchi d'sous dans unn' pouchette d'escollyi:
I' n'y laiss'ra jâmais un seul coppeur câmpri,
Car la boutique est si d'a-main, èt l'chocolat si bon,
I s'maûle aûtrément mus qué l'but d'un crayion.
Et quand l'dergni mio est mangi, tch'est qué l'garçon ergrette?
Ch'est qué sé 'n'estoumma est pus grand qué né l'est sa pouchette!
Mais tchiq' fais quand je soummes en Classe, - disons dé Géographie -
V'là t'y pon qu'unn' pouchette dèsfonce, par être trop bein chergie,
Tout boule sus l'pllanchais - et pis j'vyions d'autres corps
Empaûter, quand i peuvent nos chiers pétits trésors!
Et quand j'ervénons siez nous, qué not' mèthe vait nos chitchettes,
Ou nos dit: "J'sis bein ennyièe, garçons, dé r'grèe vos pouchettes!"
Enftn pour les pouchettes, jé sis occuo jeune, mais jé vos gage
Qué j'avons sus femmes et filles, un grand avantage: -
Y'ieûx n'ont qu' unn' pouchette - mais tchi toûonnie et tchi touistérie
Dévant qu'i peuvent trouver ouèqu'oùll' est plièchie!
Qu'i faischent don coumme ès braies - qu'au côté i la mettent,
I n'éront pon d'peine à trouver lus pouchette!
J.P.
|
