Tchi dire ou èscrire entouôre l'ammin parti?
Jé trouve en prenant ma fielle dé papi
Qué la tâche est bein pénible pour mé...
Quémment, aller au Bureau et n'entendre pus
Sa vouaie mé souhaîtant tréjous la bein-v'nue?
Oh, j'ai d'la peine à craire qué ch'est vrai!
Dé né l'trouver pus dans sé n'être au coin,
Des pap'railles dévant li, et, la plieumme à la main,
Corrigeant et griffonant dé tchi pour la Gazette...
Tchittant tout, pourtant, s'i m'viyait entrer,
Et jé pâssions un bouon quart d'heure à nos entre conter
Tchiq'fais ch'était du sérieux, mais souvent sornette.
Et tout est fini... ensemble jé n'f'rons pus dé projets
Ni jé né d'visérons pus entouôre les sujets
Dé nos èscrits pour l'Almanâh...
Tch'est qué j'pouôrrai faire à man tout seu
Quand jé vains dé perdre l'ammin tchi, dé bouan tchoeu,
M'aidjiait et m'encouôrageait au travas?
Si j'voulais vos pâsler dé touôs ses talents,
Dé sa haûte intelligence, dé san bouan sens,
Jé n'en dirais jamais assèz, jé crains...
Hélas, ma plieumme est faillyie, mes idées s'en vont,
Mais tous tchi l'counnaissaient ov mé diront,
Qué Jerri a perdu lé millieu des siens...
J.P.
Octobre 1918
|
