Touôs les bénis jours nou vait à sa porte
Marchands dé nouviâutès dé pus d'unn' sorte.

L'aut' sémaine il' y vint un patchèt si grand
Qu'i n'l'entrirent pon à pliat mais sus cant.

Unn' ênorme bouaite, ov l'adresse et l'nom
D'unn' millineur tchi n'vend qué du bé et du bon.

"Un' aut' chapé " qué jé m'dis, ov bein du git,
"Et j'gagerais qu'il' 'y couôte djiantrément chi!" -

Oull' mins dévant longtemps - pour un jour dé fête -
Y'iavait un' ouaîsai d'sus, ov coue, ailes, et tête.

Un chapé tchi l'y muchait la maîntchi d'sa fache:
Fait pour badrer san galant quand i l'embrache.

Seûre qu'ov ditet il a pus d'minsère et d'peinne
Qué quand ou n'mèt qué san b'ianc bounnèt d'laine...

Chet' êtè ou s'proum'nait ligièrement vêtue,
Nou viyiait... oui, oui... ses biaux bras touôs nus.

I faîsait si grand' caud, qué not' démouaiselle
Né mettait qué mouss'linne, guernie d'dentelle.

Acheteu oull' a des robes si êtraites au bas,
Qué quand ou marche ché n'est qu'à p'tits pas -

Pour s'empêchi dé rire, ch'est contre nature. -
Quand i faut qu'ou monte dans van ou véture!

Sa robe né l'y veint qu'à la qu'ville du pi,
Pas bésoin dé la r'trousser pour bo'e ou ponsi.

Mais pour la r'trousser, coumment don s'y prendre?
Ov dé tchi si êtrait faudrait trillyi ou fendre!

La courte robe nos fait vais ses finnes bottes vernies,
I n'y'ia pas à s'y tromper, ou va bein caûchie.

Ses caûches... ah, bon, ch'est-y pon tchurieux,
J'ai oubliyiè dê vos pâsler dé sa têtèe dé qu'veux:

Mais est-che toute à lyi, chutte grand' touffe là?
Est-che lé Harleine, le Koko, qu'est caûse dé chounna?

Lé temps pâssè oull' en avait, eh bein, moyienn'ment,
Acheteu oull' en a haût coumme tchiq' monûment!

Y'ià un mystère là d'dans qué jé n'peux explitchi,
Du travâs, j'm'en doute, dé tchiq' perrutchi!

Enfin si Miss Suzon sièd toutes les modes du jour,
Jé m'en fiche bein... ché n'est pas mé tchi paie pour!

J. P.
1911