"Jé sis ennyiè d'attendre - j'voudrais frumer maison,
"Tch'est don qu'ils ont à s'ent' dire, ma fille et san galant,
"Pour s'y t'nin jusqu'àchet'eu? - i' n'ont pas d'raîson,
"Et oublyient qué l'gaz est à brûler tout l'temps!" -

Bobby, l'èspiègle dé la famille, un rusè grivoës,
Entendit la pliainte qué san père avait fait -
Et sé faûfillit dans l'allèe sus l'but dé ses ortés
Pour èspier dans l'parleux par lé creux dé la cliè.

I' n'fut pas hors longtemps, lé chier innocent,
Mais i' r'vint, sans brit, ertrouver san père,
Et i' l'i conti tout bas, et bein sérieûsement,
Chein qu'i l'avait veu, et lé v'chin s'n'histhouaire:-

"Papa," qu'i' dît, "ché n'est pas Henri qu'i' faût bliaûmer,
"Quand même qu'il en érait envie, i' n'peut pas bouôgi,
"Ch'est Ethel, ma soeur, qui l'empêche dé s'n'aller,
"Et pour lé garder là, ou s'est assise sus l'i!" -

J. P.
1914.