I n'yia persounne tchi né s'en d'mente,
Les gens sont tréjous dans l'attente
D'avér pour yeux chein qu'est bon et bé -
Nou crait qué ch'est chose correcte
D'être sé-maîme s'enn' architecte
Quand nou bâtie san châté.

Jeunnes et viers, coumme nou s'y travaille!
Oubliant tous qué la muraille
N'a san fondement qué dans l'air;
"Bah," qué nou s'dit: "si chet' ichin tchait
"Un' aûtre pus bé, et fait d'annièt,
"Remplièch'ra vite lé chein dé hier!" -

L'âge, jé vos l'asseûre, né y'iest pour rein:
Un vieux s'dira: "Jé pouôrrais bein
"Rester ichin bas occouo longtemps" -
Et quoiqu'accâblyiè dé roumatisse,
L'ancien, tout coumme, fait s'enn'êdifice:
Un châté sus dé nouviâux plians

Pour les jeunnes gens faût-y s'èstounner
Si pâssent lus temps à machounner
Dé biaux châtchiaux pour lé temps à v'nin?
Unn' tour annièt, unn' aûtre démain,
Et ov lus bâtisse i craient don bein
En garder déhors peinne et chagrin.

L'amouôreux étout, en faîsant san choix
D'unn' fillyiette tchi l'y paraît
Etre l'image dé la perfection,
A bâti san châté dévant être mariè:
Piesse t'y jâmais n'aver l'dèspièt
Dé l'vais en êtat dé dêmolition!

Lé fermi en pliantant ses patates
N'yièpeigne pon guânos ou phosphates
Et s'crait en vouaie dé faire fortunne;
Hélas, san châté, à la fin d'Avri',
Sé trouve souvent bein dèsmoli
Par l'aûbe-gélèe, au r'tchiant d'la lunne!

Lé pauvre en fait étout pourtant,
Des châtchiaux qui n'sont ni haûts ni grands,
Mais i n'y gâgne rein, lé pouôre médjiant ,
Siez-li la famille craît et craît,
Et i y'i'arrive pus dé poupets
Qui n'fait dé quartchiers dé froment.

Tour dé Babel, ou p'tite construction,
Fondée sus l'espoir ou sus l'ambition,
Dé vos fabritchi en est-on d'mus?
Vot' fondement n'est jâmais bein raide
Châtchiaux en Espagne, bâtis dans l'viède,
Unn' brise veint d'travers et vos v'la fichus!

J. P.
1912.