|
J'm'en vais vos conter pour mé n'ammin, Jamais ou n'avès counnu millyieu, Chein qu'i fait pour mé, sair ou matin, Est tréjous fait d'bouan tchoeu. I l'est tréjous content dé m'vais, I me l'montre dans sa fache surtout Et j'pouôrrais m'fier d'sus, jé l'gag'rais N'importe quand ou y'iou. Y'ià du monde pourtant qu'ont observè Qué sa couleur peut l'y faire tort, Qué san nèz, étout, est ertroussè, Et hardi trop d'un bord. Enfin s'i n'est pon parfait dans chounna, Dites mé, av'ous tchq'fais ermertchi Lé bouan r'gard qu'i vos dounn'ra Ov ses biaûx yieux pliens d'amiètchi? Dé ses anchêtres jé n'dirai pon S'i pouôrrait dutout s'en vanter, Tch'est qu'il' en est? li, i l'est bon, Et né v'là tout chein qué j'en sait. Quand maîme qué mé n'ammin en érait yieu Drière l'i unn' longue traînèe, Ses anchêtres pouôrraient-i achet'eu Amender san sort, sa r'noummèe? J'soummes viers ammins, v'là pus djièz ans Qui n'a jamais voulu m'tchitter, J'soummes tréjous d'accord et j'comprends Qué j'sis pour li chein qu'il est pour mé. Car mé n'ammin n'est qu'un tchan, Un tchan fidèle, et dé bouanne humeur, I' l'y dounne dé chein qu'j'ai, et i l'prend, Et y'ièn a tchi doutent dé sa valeur! Persounne né mé d'mandent si j'veurs lé vendre, Persounne, jé crai, n'en a envie, Car jé lus f'rais bein vite comprendre, Qué man tchan, mé n'ammin, n'a pon d'prix. Jamais jé n'voudrais faire ditèt, Man tchan m'aût pus qu'argent ou or, Quoique san nèz est ertroussè, Et trop portè d'un bord! JP 1913 "Buster Bond" dé Carrie Jacobs-Bond |
Viyiz étout: