|
Ch'était unn' bordée pour an achat de terrain Que l'Oncle Tom et san biau-fréthe, l'Escrivain, Eurent unn assez longue affaithe en main; Et i' fallut dêhaller forche papiers et contrâts Que mînniet sounni devant que lus travas Fusse tout a fait fini - Las gens s'en étaient touôs allés se couochi, Du mains i' le pensaient, Et touôs seurs à bas i' bévaient eunne fais - Car tant de d'vis assique le gôsi - Quand, tout d'un coup, i' ouirent un drôle de brit! L'Escrivain en vint nerveux - “Ecoute, man garçon” I' dit à l'onclye, “As-tu oui as-tu oui? Tu-as des voleurs à raûder dans ta maison, Tch' est que j'allons faithe?” - "Faut les happer,” - Dit Tom - sans faithe la minné de s'gêner; “Je t'asseûthe que ché s'ra chose bein aîsie. Vé-t'en ov me - j'ai m'en arme chergie, La, prends man gros pistolet” ... “Ah ma fingre, nou fait" Se fit le bieau fréthe, "ché n'est pon pour me De faithe feu sus des peûles qu' entrent siéz te; S'i' 'taient occouo en Cour je f'rais de man mus Pour lus en baillyi siez mais, ou peu' t' être pus, Mais ichîn ch'est pour te de tirer dessus!” - Et l'Escrivain tchi ne s'était pon engagi pour happer des voleurs (I' n'éthait pon seu combein chergi pour chounna sus san compte) I' voulait rester drièthe - Tout mârri de ses teurs L'onclye lî dounne un fouet, car il en avait honte, Et i'prend le pas l'avant s'enn' arme toute prête, - Don, sans faithe de brit i' d'vallent les d'grés Tchi mennent à la tchuisine: - La, "arette” Tom dit en bas - "I' sont la d'dans ... les v'la happés!” En êffet i' ouient unn' mainoeuvre coumme du monde à patchi Des marchandises dans du fort brun papi... D'un coup d'pid la porte fut vite dêfoncée, Et v'la nos deux hoummes tchi font lus entrée, Et... touônant les sens à la tchuisinniéthe Tchi, pensant qu'à chett' heure là la côte s'rait claithe, Etait à se ouàitchinner le corps en bain dans le mitan de l'aithe!
|
Viyiz étout: