Les Pages Jèrriaises

Unn' Bollèe dé bouanne Soupe

Nou z'est-y don bête dans bein des temps,
Ch'est la faûte à chès fichus docteurs -
Nou dèspense ses sous en médicaments,
Quand nos r'mièdes valent mus qué les leurs!

Mais ou z'en doutèz - et ou mé dirèz peut-être:
"Touôs vos tracâs pour amender nos maûx
Pour bein s'en servi y faût les counnaître,
Et saver les arrangi êtout coumme y faût."

Voire, mais nou trouve t'y pon, ichin et là,
Des ammins tchi vos offrent des avis pour rein?
"Prennèz chein qué j'vos dit pour votre estoumma,
Et," s'font-y, "j'soummes seûrs qui vos f'ra du bein."

Lus r'miède s'ra simple, et à bouan marchi,
Yieun à tchi ou n'érêtes jâmais creu ou pensè,
N'y r'gardèz pon d'près si ou voulèz vos guéri,
Maîme si ché n'est qué tchiq' sorte dé saletè!

Escoutèz l'histouait d'un pouôre triste mâtin,
Qu'était happè d'un mâ... djiantre! coumment l'explitchi?
Les docteurs l'y dounnent un biaû nom en Latin,
Pour qué les gens modestes né l'trouve pon grôssi!

San mâ ch'tait unn' minsère tchi l'vengeait hardi,
En compagnie y n'était jamais à s'n'aîse
Car l'affaire l'y v'nait sans aûtchun averti,
Et y mouoillyiait souvent lé couôssin d'la tchaîse!

Y faisait coumme chounna ètout dans san lièt...
Et quand v'là qu'èscaûffait - peugh! tchill' odeu!
Ché n'était pon bouann'ment coumme sièz Mess Pitchèt,
Et v'là tchi cottissait bein vite un lincheu!

Sa femme s'ennyiait dé r'grée et dé sitchi,
Et en lavant ditè oull'en faisait des grinnes;
Tout coumme ou faisait dé san mus pour l'y,
Et lé dôssait joliment dé toutes sortes dé med'cinnes.

Mais rein n'arrêtait l'mâ', - y v'nait pûstôt pière,
Et lé malade était tréjous dans d'la mucreu,
Quand tch'est qu'arrive un jour sinon san biaû-frère,
Yieun qué pour longtemps ou n'avait pon veu.

Ch'enn' tait yieun tchi s'pliaisait a doctrinner l'monde,
Dé ses r'mièdes tchq's'uns en faisaient unn' ris'lèe,
Mais si unn' tîsainne mantchait, y'l'en trouvait unn' s'conde,
Enfin y'n'tuait jâmais persounne - coumme d'autres, ou savèz!

Quand sa belle-soeu' vint à l'y conter sa peinne,
Y la print par la taille, l'y disant, - "M'est avis
Qué jé peux guéri Tom dans mains d'unn' sémaine,
Mais y faût l'y dounner dé la soupe dé souôris!"

"Dé souôris!" s'fît l'autre, - "ah bein, s'emn'ange!
Jé m'en vais don tout-d'un coup y'ièn happer,
Y n'en manque pon, ma fingre, dans not' grange,
Et jé n'erai pon dé peinne à en atrapper!"

Ossi vite fait qué dit - et v'là unn' fouaie allummèe,
Et y s'minrent les deux à faire lus bouoillion;-
Y n'en dirent mot à Tom quand y'l'eût sa bollèe,
Et y'l'avalit tout... - y'l' trouvit si bon!

Eh bein, l'érêtes-ous pensè? - Notre houmme s'er'fît!
Et lé couôrant erprint sa course ordinaire,
Mais ch'tait grâce à la bollèe dé soupe dé souôris -
Jé sis seûre qu'ou z'êtes touôs prêts à l'craire!

* * *


Mais pour Tom... achet'eu, ch'est assèz tchurieux:
(J'enn' sait pon tch'est qu'est caûse dé chounna...)
Ch'est certain qué not' ammin veint hardi nerveux,
Quand y vait couôrre sait catte ou bein ca'!!!

JP
1907

 

Viyiz étout:

 

Les Pages Jèrriaises