Les Pages Jèrriaises

Mathi'-ous, Garcons, Mathi'-ous


Êtes-ous ennyés dé vot' existence,
Dé ses pliaisièrs, dé ses douo'cheurs?
Voul'-ous tréjous faithe pénitence,
N'aver qué mînsèthes, qué malheurs?
Et pis, étout, sus vos pouôrres couennes
Porter des mèrques dé grîns, dé coups?
Si ou voulez d'ité, prennez des chaines;
Et, mes garçons, mathi'-ous!

Si ous aimez qu'nou vos tormente,
Prannez eune femme, ma fé, dès d'main:
Y'en a dgix, ou vîngt, ou trente
Tchi vos attendant, jé gag'geais bein!
Et n'allez pon liain, lé temps s'y pèrd.
Y'en a partout, y'en a pour tous,
Tchi vos f'thont vaie tout à l'envèrs,
Et si ous en voulez, mathi'-ous!

Si ou souhaitez siéthe l'êtitchette,
Dêpenser vos sou en présents couôteux,
Prannez pour femme eune vraie cotchette,
Et vot' malheu né s'sa pon douteux.
Si ou chouaîsissez pour vot' goût,
Ou vèrrez, ma fîngre, qu'ou s'sa jalouse:
Eh bein don, garçons, mathi'-ous!

Si ch'est l'escliavage tchi vos enchante,
Si ous y trouvez bein des appias,
Prannez eune femme tchi pâsse quarente,
Et ou vos siétha pas à pas.
Si ou la prannez pour ses richesses,
Jé n'vos dithai qu'deux mots: Gare à vous!
Êprouvez-y, garçons, et mathi'-ous!

Si ous en pranniez ieune pour sa bieauté,
Si ou n'a qu'chenna, ou s'sa faînianne,
Et ou vos trouv'thez dans p'tit d'temps trompé,
Mais ché s'sa pon faute à pèrsonne.
Si ch'en est ieune qu'aime les bieaux habits,
Des robes dé souaie, dé satin, dé v'lous,
Vot' bourse, bein seux, es'sa bein vite viédgie.
Enfîn, mes garçons, mathi'-ous!

Mais si ous aviez la chance d'en trouver eune bouonne,
Et si ou vos pliaît, n'allez pon la mantchi:
Vot' mênage itha bein, sans discord ou chicanne,
Et l'chagrîn né vos f'tha janmais maigri!
Ou vivrez tout l'temps en paix et en r'pos,
Ou trouv'thez tréjous tout à vot' goût.
Si ou la rencontrez, né lî touônnez pas l'dos,
Mais si ou vos veurt, happez-la, et mathi'-ous!

J.P.

 

Viyiz étout:

 

Les Pages Jèrriaises