Les Pages Jèrriaises

Prêtro

Si au bureau y'ià d'la peine et du chagrin,
Dans l'chimtchière dé l'Églyise vraîment i n'yièn a pon,
Là, dans les verts chênes tout lé tracas d'ouais'lin
S'y rèsjouit d'unn' vilaine faishon;
Nou n'ouait qué des twee twee en pâssant par la rue:
Car Prêtro, lus enn'min, est mort - Prêtro n'est pus!

Lé nier cat en mangeait t'i dé chès fichus mouaissons!
Ch'tait pour chounna qu'i l'tait tréjous gros et gras -
I lus faisait la guerre dans toutes les saïsons,
Sans sé gêner sis la chasse était frumèe ou pas...
Muchi drière un tombé, fallait l'vais saûter d'sus,
Mais Prêtro est mort - Prêtro n'ira pus!

Les cheins dé la maison jamais né lé r'verront
Sé r'litchi les babinnes toutes touôllyies dé lait,
Ou bein, s'i faisait caûd, èstrav'lè tout san long
Parmi les gérémiennes sus l'parapèt -
Ouèque sans pé erlisait coumme l'or sus la Statue;
Achet'eu Prêtro est mort - lé nier cat n'est pus!

Chu pouôre chier mâtîn qué nou s'a tant fliattè
Unn' main sus san dos, l'aûtre dans la vielle bouëte à s'no!
Quand la bouëte disparut, ch'fut unn' calamitè,
Mais rein à comparaitre à la perte dé Prêtro!
Unn' bouëte à s'no sé remplièche si l'aûtre est perdue,
Tchi cat peut remplièchi Prêtro - hélas, qu'i n'est pus?

Ses amouôreuses sont en deu' - lé long des ny'its
Les mirouâux qu'i font resvillent lé vaïsinai -
Lus lamentations sont la câuse d'un tas dé maûvais d'vis,
Et tous voudraient bein les exterminer!
Les vaîsins en affoll'ront si chonna continue...
Mais les cattes ont biaû piâllyi - Prêtro n'est pus!

Jé mé d'mande tch'est qu'est dév'nu dé sa carcasse?
Lé "Destructeur" l'a t'i yieux pour la "crémater"?
Car jé sais bein qu'i n'yià pas à la maison dé la "Place,"
Un p'tit coin dé gardin pour pouver l'enterrer...
Enfin jé sis seûre qué san maître a don fait dé san mus
Pour les restes mortels dé san cat - dé Prêtro qu'i n'est pus!

 

J.P.
Octobre 1914

 

Viyiz étout:

 

Les Pages Jèrriaises