|
Avous ouï l'histouaire Pour not' jeunn' Vitchaire Tchi rempliaichait lé Recteur sus sa fin? Sortant du collège, la tête pleine dé Latin Y l'en débitait des buts dans ses discours, Y mêlait la politique - ch'est la mode dé nos jours - Biau garçon, bein plianté Mais nerveux à un divers dégré, Y souffrait quand y'l t'ait entraîné Par les vielles filles dé sa congrégâtion, Car y fallait siez y'ieux aller bère du thaie, Mangi galettes, gâches et pâtés Assez pour trébutchi sa constitution! Et pis les jeunnes? Coumme ch'est tréjous lé cas Y faisaient pour l'y toutes sortes de travas: Des bounnets dé niet, des antémicasseurs, Des mitaines, des cauches, et un tâs dé slippeurs; Jé vos asseure qui né l'y mantchait dé rein, Les présents l'y v'naient coumme vraic au plyien! Mais y y'ien avait yieunne parmi y'ieux Timide et modeste, qu'érait yieu grand peux D'envier au Vitchaire lé pus p'tit présent - Et pourtant les deux s'entré vyiaient souvent, Es tchaies d'Escole, fètes d'Eglyise, ou concerts Y faisaient ensemble dé la parchounnie, Et chès job là èsprouvent souvent les ner's D'un jeunne couple qu'ont trop de modestie! Et dans chu cas ichin, l'amour s'en mêli; - Mais quand un galant n'est pon hardi, Qu'y n'a pas grand boutt' dé hors. Qu'en paslant à sa blonde, y bégaude et rouôgis, Faut y pon qu'oulle aide au pouôre corps? Les hardelles le font, neu' câs hors dé djix! Un Dimanche matin, lé service fini, Lé Vitchaire s'en fut la r'condire siez l'yi - Et la fillette vit qu'il 'tait tout sérieux, Qu'y l'avait tchique chose sus l'esprit, Il 't'ait bianc coumme chitchette, ben nerveux, Disait deux mots - s'arrêtait tout court - Y voulait, pouôre corps, l'y pâsler d'amour, Mais y n'savait pon coumment s'y prendre? La hardelle, l'yi, avait lé tchoeur tendre, Et ou d'vinni - instinct de femme - s'enn embarras....... Ou prend la Litourgie qu'y portait souôas lé bras Touône vite page sus page, Et arrête quand ou veint au: “Mariage.” Ou pointe ov san daigt tout modestément A un pâssage bien important: - “Veux-tu prendre cette femme pour ton épouse?” - Y prend lé Livre tout èsnervè - Mais coumme flieur fliètrie par lé solè Sé ravigotte quand n'ou l'arrouse Y'l'en fut dé maîme ov' notre amouôreux; Il oubliyi ses ner's et sa peux En lyièsant chès bénites paroles là!..... Ch'était vite d'y respondre, et pour chounna Tout content, presque hors dé l'y maîme, Y trouve sa rêponse au “Baptême”: - “Je le veux - “ La fillette lé ouatchait Assez gêné, ou pouvez lé craire, “M'a t'y comprinse?” ou sé d'mandait, “ Jé sis t'y seûre dé m'enn' affaire?” - Y l'y r'dounne lé livre - mais justément Y pâssait dans lé temps unn' brise dé vent Tchi jouant ov les pages dé la Litourgie Les touôni du Baptème à la “Litanie”! Lé Vichaire né vit rein dé la farce, Y'l'avait les yiers par ailleurs, ma fé, Et la fillette lut - la pouôre pétite garce - La réponse ben counnue dé tous: - “De tout mal, de toute méchanceté... “Et des assauts du diable... délivre nous!” J.D.R. |
Viyiz étout: