Un pouôre baloque sé disait unn' fais:
- "Nom dé la vie! Bigres d'ortés,
Est-che pour ditêt qu'ou z'avèz 'tait faits?
A vos enflyier d'maîme coumme par orghi,
A m'tormenter et à m'trébutchi l'pi'd?
Ou z'avèz bouanne minne... voire, touôs les djix,
Dépis les deux gros jusqu'ès deux p'tits,
Touôs cou'erts dé r'fraideûres, et d'unn' belle sorte,
Ah qué... coumm'est san nom?... les emporte! -"
I oublyiait qué... coumm'est san nom?... n'a pon l'pi'd fait
Pour cors, erfraideûres, ou ditêt,
Et qu'i peut s'motchi des gens et d'lus affliction,
Car i' l'en èscappe... coumm'est san nom?...
Chein qué les Français appellent l'engelure,
Né venge pon les cheins qu'ont la couônne dure,
Nennin, ma fingre, la scélérate
Cherche pustôt d'la chai d'licate
Unn' plièche tendre et qu'ou peut pitchi,
Un but d'ouôreille, la main, lé pi'd -
Ou verrèz tchiq'fais qué vot' erfraideûre,
S'èscorchéra quand ou s'ra meûre,
Et nou dirait vraîment, m'est avis,
Unn' saûciche bein fricachie!

En êtè, ergardèz mé chutte hardelle là,
A tennis ou à hockey, coumme ou l'y va
Ichin et là, toute l'arlévèe
Ou saute et gigotte... est-alle dèslièe!
Car à ses pi'ds mignons et bein faits,
Oulle a des bottes dé la size dé trais;
Crairait n'ou qu'en hivé ses ergots
Veindraient touôs enflyiès et si gros,
Qué pour être à s'n aîse, et bein caûchie,
I y'ièn faûdrait unn' pârre dé la size dé six?

J'ai ouï dire souvent à bein des gens,
Qué ch'est seul'ment richesse de sang
Tchi vos amène chutte minsère-là,
Et qu'i y'ià moyien dé cachi chounna:
Ch'est dé s'tremper les pi'ds dans du pickl'e:
Prendre l'iaûe bouilliante en sortant du tickl'e,
Et mettre dans tchiq' vaissé ou boutchèt,
Une poignie d'soda et deux d'gros sé -
I paraît qué, trémpèes dans unn' saûce pareille,
Qué les r'fraideûres fliètrissent à merveille!
Va don pour lé pi'd... mais l'ouôreille???

J.P.
1912