Les Pages Jèrriaises

Les désappointements.

Quand pour un jour dé fête qu'ou mettèz vot neu' fât,
Yieun qué l'marchand vos a vendu pour être du millyieu drap,
Qu'y veint unn' squâlle dé plyie, qu'ou z'êtes trempé l'travers,
Et qué vos gambes dé braies raccourchent d'un bouan tchiers,
Et qué lé drap à la plièche d'être nai touône sus l'vert:
Désappointement!

Quand ou mettèz unn' poule à couër sus d's oeufs tchi couôtent chi,
Qu'ou voulèz au préchain Show, lé pus haût prix gâgni,
Et qué persounne aut' qué vous n'ait dé poulettes pareilles,
Tchi saient parfaites partout: crêtes, pids, coues et ailes,
Si ou trouvez qué touês les oeufs né sont qué bouteilles:
Désappointement!

Quand ou faites la carte à unn' hardelle qu'à du bein,
Et qu'ou n'avez pas dé sous, ou du mains presqué rein,
Sinon tout plyien d'affront, et du "quant-à-moué,"
Si ch'est ov lé but d'sa botte qué san papa vos r'chêt,
Quand ou z'allez tout bouann'ment pour la demander:
Désappointement!

Quand à l'âge dé quarante ou qu'menchis à perdre vos qu'veux,
Qu'ou z'achatez du Tatcheau - un r'miède merveillieux -
Et qué sai et matin ou frottez vot' tête ov chounna.
Qu'ou trouvez qué pustôt d'en r'craitre, lé restant s'en va,
Laissant vot' tète ossi nette coumme lé fond d'un pliat:
Désappointement!

Quand ou vos portez candidat pour Député, pour Chant'gni,
Pour Counnètable, pour Juge, qu'ou vos faites seûre dé gâgni,
Qu'ou despensez, les sous en ribbans, circhulaires, coumités,
En flag, et en band, qu'ou faites un tâs dé frais,
Et qué quand veint l'Election ou perdez d'unn' seule vouaie:
Désappointement!

Pour un père dé famille, ché n'est qu'à juste raison
Qué, s'y'la sept ou huit filles, qu'y voudrait un garçon,
"Tchi faire" - y sé d'mande, "ov un tel tâs dé hardelles?"
Un jour veint, qu'à bas, pâstienment y'l'attend les nouvelles.
V'là la gardjienne qu'entre: "Moussieu, ch'est des jumelles!"
Désappointement!

Quand ou z'allez parfais à tchique grande Assemblée,
Qu'ou laissis vot' bouan parapluie ou chapé dans l'allée,
Si ou restez a bagouler, sortant yieun des derniers,
Ou z'érez biau les cherchi, et escaler les yiers,
Y s'ront touôs les deux hors, ou n'en trouv'rez qué d'viers:
Désappointement!

Pour un pouôre rhymeux tchi lyièt dé chin qu'il a escrit,
Quand y crait faire du fun ès gens, mais qué persounne n'en rit,
Pour pus d'un Orateur grimpè sus unn' estrade,
Qu'est erchu par lé suffliet, lé brit, la houpade,
Ch'est, pour seûre, maugrè un mio de bravade
Désappointement!

Pour un couôreux sus bicycle tch'atrappe unn' poncture,
Pour l'houmme qu'achate un ch'va tchi n'est pon d'nature,
Pour la femme tchi dans l'âtre fricasshe ou fait d'la g'lèe,
Quand y tchait des bôtchéts d'sie d'avaut la chimnèe,
Pour l'houmme t'chi r'veint lé sai dé san travâs lâssè,
Mais qu'a cause du "lavage" né trouve qué fricot fraid,
Quand nou paye un èschu pour unn' crabeGuernésy,
Et qu'oull' est toute plienne d'jiaue, qui n'y'ia rein a mangi,
Pour la fille tchi n's marie pon, et qu'en a grand' envie,
Et tchi perd ses attraits à m'sure qu'ou veillyie,
Pour lé faiseux dé discours pour missions ou Tempérance,
Tchi n'a qué coppeurs dans la bouëte à la fin d'la séance;
Et y'ien a tant d'autres qu'en ont mais pour fini la léçon,
Je direai qu'a toute règle y'i à unn' exception:-
"Dé la Nouvelle Chronique, achatez l'Almanach,"
Et jé gage qué pour vous ché né s'ra pon un cas
Dé désappointement!"

J. P.

 

Viyiz étout:

 

Les Pages Jèrriaises