|
L'aut' jour, deux nice demouaiselles, Des jeunnes étout, et dé belles, S'entr' rencontrirent dé tchiq' bord en ville, Et s'lon l'habitude entre femme ou fille Y'ieût châq'rie dé main, et dé l'embrassh'rie: Des "kiss" dé perdus, et tchi firent grand' envie A deusse trais d'lus galans Tchi pâssaient dans l'temps Et a tchi y n'en faisaient jamais autant (?) Lé caquèt don qu'menchit - chatchunne en fit sa shâre, Quand y'ieunne dit a l'autre: "Dis-don, vot' Bazâar A-t'y reussi, en avous fait lé sou?" - - "Au contraire," sé fit l'autre "j'y soummes a r'tou." - "Dame, mais lé Recteur est don désappointé?" "Au contraire, ma chière, y'l'en est satisfait, Ché s'ra l'y, après tout, Tchi f'ra lé pus biau coup; Car quand jé né pouvions pus rein vendre ès messieux, Jé nos soummes toutes minses à lus faire les doux yieux Et vraîment, ma chière, jé n'y'avons pas perdu not' temps, Dans deux jours j'avons y'ieu treize engagements!" "Mais," s'fît l'autre, "pour lé Recteur, jé n'y comprends rein. Coumm'est qué chonna peut l'y faire du bein?" - "Oh, ma chière amie, est tu niaise! Touôs les couples engagis sont dé sa pâraisse, Y les marièra... lé vais-tu bein ach'teu? Y'ls empaûtront les "fees" entre l'y et l'Lecteu!" - J.P. |
Viyiz étout: