Nou n'en pâsle pus du thée d'Comière,
Lé bouan vier ermiède du bouan vier temps,
Ch'tait au r'nouvé qu'i fallait en bère
Pour réglyi l'corps et purifier l'sang.
Unn' fais l'matin ou dans l'arlévèe
Nou s'en prennait unn' raide bouanne lache,
Et v'la tchi cachait les vers du nèz,
Ou les bibettes dé d'sus la fache!
Les bouann'femmes disaient quand on viyiait la mé
Qué l'odeu' d'la flieur en'tait pus forte,
Si nou la sentait d'un but, nous s'tait seûre d'aver
Dé la comière dé la bouanne sorte.
Bien ramâssèe et bein sitchie -
- I savaient au juste coumment la grée, -
I n'en fallait pon eunne' grosse pinchie
Pour en haller unn' pinte dé thée.
Et la vertu dé chutte tisaîne-là
D'un goût erlévè et amièrti
Etait qu'ou ravigottait l'estoumma,
Et vos dounnait dé l'appétit.
Si don les gens v'naient et gras,
Ov lus chai' si saine et cliaire,
I fallait dire, n'en doutèz pas,
Qu'i d'vaient chounna au thée d'comière!
Les gens d'ach'teu n'en veulent don pus
Dé simples ermièdes à bouan marchi,
Et i craient tous faire hardi mus
En avalant des drogues d'apotitchi
Ov lus pales faches si les villaises
Savaient s'y prendre d'la bouanne manière,
Lus jo'es amend'raient, et jé sis bein aise
Dé lus r'quémander lé Thée d'Comière!
J P.
1911
|
