Mais y'ien a yieu dé touôs temps,
Et nos preumiers parents
Coumme l'histouaire nos l'dit, n'en furent pon exempts;
Car quand unn' fais chassès du Paradis,
Y trouvirent, à lus grand' surprinse
Qu y n'avaient rein sûs l'co' - pas seulement dé qu'minse;
Y fallait don bein vite sé faire des habits.
Et n'ou dévinne bein la minsère
Qu'eût Adam, not' grand'-père
Quand y' l'entréprint un jour l'èstât dé couôturi,
Pour sé fabriqui des braies ov' des fièlles dé fidgi!

Mais la mode a bein changi dépis chu temps-là,
Et si j'en achatons dé bâzin, dé telle, ou dé drap
J'avons tréjous nos p'tites minsères tout coumme:
Car y'ià t'y pière, dites-mé, pour faire pester unn' houmme
Et tchi l'tente à faire servi dé vilain langage,
Qué quand y coule ses braies, et qu'y'l'est bein pressi,
Y'l'y trouve qué les boutons n'y tchiennent qué par un fi'
Et saver qué s'enn' autre parre est horte au lavage!!

Disons qu'un' homme pour ses r'pâs, est bein aînitcheûx,
Qué la moindre des choses l'y touône l'estoumma', -
Qu'y dîne sièz unn' ammin - quoiqu'y'l'ait grand peûx
Dé mangi trop dé choun'chin, ou trop dé chounna.
En mangeant sa soupe, fait-y pon unn' grimache?
Ma fingre, y deshalle êtout tchiq' chose dé sa bouôche...
Ah, la minsère lé sièd: ch'est unn' belle grosse limache
Tchi s'est trouvèe bouôllyie en tchuisant la caboche!

Unn' sairèe, vos v'là à un Dîner - en haûte coumpâgnie -
(Y'ià sus la carte un "ménu " long coumme lé bras,)
Ou z'avèz vot' biau d'vant dé q'minse, et unn' "queue de pie,"
Et ou cryiz qué minsère né vos y trouvéra pas?
Attendèz - v'là t'y pon qu'aû mitan du festin,
Justément quand ou gouôtez lé millieu du fricot.
Qu'un bachouard dé "waiteur" verse unn' pinte dé graîvin,
La maîntchi sûs vos g'nors, lé restant dans vot' co'! -

Quand y fait caûd à tout fondre, qu'ou z'allèz vos couôchi
Pour être à votre aîse, souôs un biau gros poummi,
Ou dormèz, ou rêsvèz, et ronfiièz coumme un père...
Mais un vêpre vos guette - en v'là t'y unn' minsère? -
Y prend vot' nez (tchit r'lîse) pour tchiq' sorte dé fruit,
Y l'y gouôte - sé mârrie - et vos v'là pitchi...
Et chein qu'ou z'avez gâgni par vos couôchi à l'ombre
Ch'est un nez qu'est gros coumme unn' moyienne concombre?

Eh bein, pour les p'tites minsères, en v'là don deusse trais,
Mais lé temps mé manq'rait s'y fallait vos conter
Etout pour lé mâ' qué font les p'tits bibêts
Tchi sé coulent dans vos yièrs et vos font lermer
Quand vos camarades content des "histouaires pour rire."

Et pis ov' chounna jé pouôrrais vos en èscrire
Entouôre les p'tits miôs dé grès ou dé gravi
Qu'entrent dans vos bottes, et vos empèchent dé marchi,
Mais qu'ou n'ôsez pas ôter dé peux qué la coumpagnie
Né valent votre cauche qu'est mal'ment perchie!

Ou bein quand ou vos trouvèz tchiq' fais à concert ou fête,
Assis ôprês d'unn' emblième qu'à du fraid dans la téte,
Et a tchi lé nez dégoutte coumme unn' avaût no' -
Qué la salle est au comble pour lé dire en un mot
Ou z'êtes djix sus un banc qui n'est fait qué pour sept,
Qué votre vaisin sé met à esternuer - sécours, tchil' achie!
V'là tchi né fait pon dé bein à vos bouans habits,
Et chu baloque là a oublié san mouôchet d'pouchette!...

J. P.