Yieun des perrots - un gros vert - apparténait
Au bouan vier Recteur dé la pâraisse,
Pour l'aûtre - un biaû gris - li, il avait
Unn' ancienne dame pour sa maîtresse.

A sén ouaîsai, lé digne Recteur
Ov bein d'la peine et bein d'la pratique.
Y'iavait apprins à r'citer tout par tchoeur
La Litanie, et tchiq' versets d'cantique.

La vielle dame, dé jour, tréjous gardait l'sien
Ov l'yi, dans san parleux, pour jouï dé san caquèt,
Mais le sai, ch'tait dans la tchuisinne caud'ment dans un coin
Et la cage bein couërte, qu'i' pâssait la nièt,

La dame avait unn' servante, unn' assèz bouanne hardelle,
Qui la servait bein, et faîsait san d'vai,
Et sa maîtresse y'iavait promins, s'ou l'y restait fidèle,
Dé l'y laissi ses sous quand ou mouôrrait.

Mais les années s'pâssaient, et la dame né montrait
Ni trace ni signe d'aûtchunne maladie......
Et la servante touôs les jours la r'gardant trouvait
Qué la bouann femme, hèlas, t'nait bein trop à la vie!

Lé sai don, dans sa tchuisinne, allant et v'nant,
On s'en plaignait tout haût en faîsant san tripot,
Disant vingt fais la même chose et oubliyiant
Qu'oull' tait à apprendre chonnna au fichu perrot!...

L'ouaisai, bein èsvillyi, èscoutait lé discours à la garse,
Par sa vouaie i' savait qu'ou n'disait rein dé bon,
Et pensant qué dans tchiques temps i'l'y jouôrait unn' farce,
Il apprint bein vite sa nouvelle lécon.

Ah ça, lé bouan Rectenr était tréjous d'avis
Qué des deux perrots, ch'tait pour seûre, lé sien
Tchi d'visait lé mus. - "Quoique," i'disait, "lé gris,
I'faût qué j'l'avoue, pasle diversément bein."

Pour s'en asseûrer, i' s'en fut sièz la dame unn' bordèe,
L'y d'mander - pour l'y faire pliaîsi, s'ou voulait apporter
San perrot au Probitaire tchiq' belle arlévèe,
Pour ouï chein qu'les ouaîsiaux pouôrr'aient s'ent'conter.

"I'n's'entre counnaissent pas," dit lé Recteur en riant,
"J'sis tchurieux d'les vais ensemble touôs les deux,
"Je s'rons seûre d'entendre tchiq'chose d'èsdifiant,
"Car si l'vôtre rit et badine, lé mein est sérieux!"

La dame étant d'accord, l'affaire fut arrangie,
Et, au jour et heure termès, pour amuser ses gens,
Lé Recteur avait invitè unn' grande compagnie,
Des vaisins étaient là ov lus femmes et l's èsfants.

Sus unn' table, châtchun dans sa cage, les deux Perrots
S'entr'examinaient assèz tchurieusement...
S'ent'faisaient des clyins, mais n'paraissaient pon dispos
A dire aûtchunne chose... ch'tait un grand d'sappointement!

Quand v'là t'i'pon qué lé gris avise la servante
Dans l'appartément assise dans un coin,
Et i'l'y vint tout d'un coup une idèe méchante :
Dé l'y jouer là la farce qu'ou méritait bein!

Imitant sa vouaie i's'mins tout haût à cryier,
En r'gardant l'autre perrot tout drait dans l's'yiers :
"Jé voudrais qué ma bouann' femme dé maîtresse crev'rait!"
"Amen, Oui, Amen! - " l'i rèspounnit lé vert!....

Consternâtion! Indignâtion!
V'la la fin dé l'histouaire en deux mots,
Et i'n'fut pus question dé conversâtion
Entre les deux célèbres Perrots!...

J. P.
1915