Les Pages Jèrriaises

MALICE!


Un vier Hollandais, débiteux d'lait,
Content d'la fortunne qu'il avait fait
Ov san commerce à l'èstrangi,
Un biaû jour sé décidi
Dé tchitter tout et s'en r'aller
Dans san pays et sé r'poser,
D'y vivre en paix lé restant d'sa vie
Et joui d'ses sous si bein gâgnis.

Boutique, cannes et m'sures, tout fut vendu,
A un bouan prix, bein entendu,
Dans dé p'tites pouques dé fort canvâs
Lé bouan'houmme print bein d'l'embarrâs
A mettre à part or et argent,
Et d'amarrer tout bein soigneusement.
Ch'tait d'la "monnaie sonnante" qu'il emportait,
Pas des billets d'banque, car i s'en mèsfiait!

Quand tout fût apprêtè pour lé viage,
Les poutchies d'sous et lé bagage,
Un cap'tainne qu'i counnaissait
Y'i' offrit un pâssage dans san baté;
I né r'fusit pon et s'en fût à bord
Portant li-maîme san p'tit trésor,
Content dé vais qui n'y'iavait qu'li
Tout seu' là-d'dans coumme pâssagi!

Seûre dé s'trouver ov du monde hounnête,
I n'muchi seulement la bouëte
Ouèqu'i gardait ses chiers herpins,
Tout coumme, il allait touôs les matins
Dèshaller un sa', et i s'amûsait
A l'vièdji d'sous pour les compter;
Unn' fais ch'tait l'or, l'autre ch'tait l'argent,
Et y r'mettait chàque pièche bein tendrément!

Mais unn' parre d'yièrs malins l'avaient guettè:
Car y'i'avait à bord un marmousèt
Apprivoîsi par les matelots.
Et qu'était pus maûvais qu'i n'tait gros;
Unn' fais lé vieux hors; ch't'anima' là
Dévale, ouvre la bouëte, et happe un sa',
Et, en faîsant san drôle dé baragouinage,
Sé saûve avec amont l'cordage!

La pouque était p'sante, mais moussieu l'guénon,
Ov unn' patte et ses dents la t'nait raide bon, -
Lé bouan'houmme l'avîsit, et, au m'sèsper,
I cryit à l'êquipage dé l'attraper!
La chasse quémenchit, mais lé malin gueux
Saûtait dé corde en corde trop vite pour yieux,
Enfin ennyiès, lâssès, i l'laissirent assis
Sus l'but d'la grand' vergue, ov pouque et poutchie?

Dans un temps i l'ouvre, et i l'virent dèshaller
Yieunne des pièches d'or qu'il 'envyit dans la mer,
Et coumme à chès bêtes-là i n'manque pon d'affront,
La préchainne i laisse tchais tout drait sus l'pont!
Et quand lé sa' fut bel et bein vièdgi
I l'fliântchi raide à la tête du pouôre vi
Qu'était à grappins bein vite à glienner
Toutes les pièches d'or qu'i pouvait trouver.

La farce finie, ov san sa' qu'à miè plyien,
Ov des tyfels et des dunder und blitz, l'ancien
Crie au marmoûsèt: "Vilaine bëte dé chorchi,
Tu'y counnaissais don tchiq'chose à man vier mêtchi?
Tu veins d'en faire du coummerce, jutchi là-haût:
Le profit fait ov l'iaue tu l'as renvyiè à l'iaue,
Et, pour aggraver tan fichu mèchét,
Tu né m'as laissi, man peûle, qué l'profit du lait!"-

J. P.
1910.

 

Viyiz étout:

 

Les Pages Jèrriaises