Ch'était à yieùn des grands Colléges angliais
Qu'unn' janne démouaiselle entri pour vais
San frère qu'était là - yien d's êtudiants
Et qu'ou n'avait pon veu pour bein longtemps.
L'i, qui n'attendait pas unn' pareille visite,
Quand i la vit la fît monter bein vite
A haût dans l'appartement ouèqu'i louôgeait
La peux l'avait print, et i craignait
D'étre veu et, pour seûre, d'en étre èstibotchi
Par touôs les farceurs alentou d'li...
(Car ch'tait un garçon modeste coumme y'ièn à p'tit!)
Là-d'dans i caqu'taient, la porte souôs clyiè,
Pas seul'ment par précaûtion, mais pour étre en seûreté...
Quand v'là tchiqu's'uns tchi tappent, et touônent la pouôgnie,
Coumme pour entrer par dé-dans sans cérémonie!
La tapp'rie erquémenche... achet'eu tchi faire?
Tout nerveux, l'aûtre muchi sa soeur dans s'n'armouaire
Et s'en va ouvrir l'hus - i vit là un vier un moussieu
Tchi paraîssait être dé raide bouanne humeu',
Qui l'y fait des exchuses, et l'y d'mande polîment
S'i l'i plaîsait l'y montrer sé n'appartément?
- "J'voudrais vais," s'fît-i, "si yià yeu des changements,
"Ch'tait l'mein au Collège, dans man janne temps. -"
Lé janne houmme, n'eût pon lé tchoeu dé l'renvrier,
Et, tout bouannment, i laisse don l'ancien entrer.
"Ha, ha," s'fît lé vieux, "eh bien, rein n'a changi,
"Méme vier tapis, et même vier foyi -
"Et même vier faûteuil - la pouôre vielle tchaise
"Ouèqué jé m'éstrav'lais pour être à men aise
"Quand j'tais ennyiè d'èscrire ou bein dé lière,
"Même vielle tabl'ye, et, ma fé, même vielle armouaire!"
Et poussè un mio par la tchuriaûsitè
I s'en apprèche.... en ouvre lé vitchèt
Et lé r'frumme bein vite... car lé bouann' houmme avait veu,
Tchiq' chose qui n'tait ni braies, ni casâque, blainket ou lincheu!
Et lé vieux riait et riait, il en paûmait dé rire...
Il en avait tant d'gît qu'il eût d'la peine à dire:
"Même... vielle... gamme! " - Laûtre rouôge coumme houmard bouollyi
Tout gêné, tout troublyié, s'en fut drait à li:
- "Moussieu, moussieu," qui l'y dit, "ou n'pensèz qu'à ma',
"Car la d'mouaiselle qu'ou z'avèz veu muchie là
"N'est aûtre qué ma soeur, et jé vos l'garantis!" -
"Et même vielle menn'tie... même vielle menn'tie!"
L'y dît lé vieux, en s'en r'allant, tout fi
Et en riant
Dé vais qué par là rein n'avait changi
Dépis san janne temps!

1915