Mauvaise fortunne veint vite assèz
Sans faire un pas pour la rencontrer.
Pourtchi vos gêner des choses passées
Qu' ou n'pouorrez jamais r'acater?
Les p'tites minsères né vos manqu'ront pas
Dans la preunmié maintchi d'vot' vie;
Pourtchi don prendre l'embarras
D'aller les cherchi, j'vos en prie?

Allons, faut tréjous faire bouanne minne,
Avec visage joyeux, riant;
Qué nou n'vaie pus dé faches chagrinnes,
Dé-s iers troubliés tristes et lèrmants;
Qué j'n'ayons pon l'esprit chergi,
Les idées sombres et sans raison;
Pourtchi s'ênerver et s'afflyigi
Entouôre des malheurs tchi n'arrivent pon?

I' y'éra des gens mârris d'vos vaie
Paraître tréjous dé bouanne humeur,
Pour ieux, hélas: i' n'y sont jamais,
I' pâssent lus temps à vos chanter malheur:
Si ous avez en vous lé sentiment
Qu'i' y'a dans la vie pus d'blianc qué d'nai,
Eh bein, faut rire et être content,
Et v'là tch'est bon assez pour mé!

J. P.
Vèrsion Jèrriaise, 1913, dé "Old Man" dé Carrie Jacobs-Bond