|
Deux démouaïselles, - jé pâsle dé maîme par pur politesse, Les app'ler vielles filles? - ah, jé n'f'rais pon ditèt - Quoiqu'ils avaient pâssé lus preûmière jeûnesse, Et perdu p't'être bein dé lus preûmière biaûtè; Deux démouaîselles, don, s'ent'pâslaient sérieusement, Assises côte à côte sus un banc dé gardin, L'aînèe contait à l'aûtre entouôre sé n'engagement, Sujet si intéressant pour lé sexe féminin! - "L'houmme qui m'a d'mandèe," ou disait, en r'gardant en bas, "N'est pas riche, ni au fait, i' n'est pon seulement bé, "Bein d'autres filles, j'en sis seûre, né l'voudraient pas, "Et l'envièrraient, étout, bein vite, à s'proum'ner!" "Mais, pourtch'est qu'tu l'as prins?" s'fît l'aûtre toute gènèe, "Tu'as 'tait bein pressie, à chein qué j'en pense." "Ah," ou dît, "quand nou pâsse quarante, qu'nou veurt être marièe, "Faût pas jamais, nan jamais, en mantchi la chance!" JP 1912 |
Viyiz étout: