Pas grand'ment d'nouvelles sus la Gazette -
Jé pasle dé la cheinne dé Samedi -
Mais pour des annonces, oull' en 'tait faite
Y'ièn avait tchinze colonnes et d'mi!
Presqué rein entouôre la politique,
Des "Locales" y'ièn avait peu gros,
V'là qu'ch'est quand l'personnel dé la Chronique
S'en va, souôs Nièrmont, ès manchots! -
Le Chef en tête, d'unn'"brochette" armè,
(Djiantre! j'avais presque èscrit "brochure" - )
Les autres sièvaient ov des poutchies d'sè,
Mais i n'taient pon tous d'la maîme stature! -
Unn' procession - un Pageant! -
Tchittant dé bouan t'choeu lé "Bureau"
Ma fé! châtchun paraissait bein content
Dé s'n'aller, souôs Nièrmont, ès manchots!
Touôs les c'ats étout ergardaient
La coue l'vèe, la procession,
Et dans lus langage s'en't disaient:
"J'érons p't'être bein un mio d'paisson!"
Ah, ouêqu'ou z'en êtes, Municipalitès,
Ov vos "trip" en Sercq, Dinard, St. Malos?
Pour aver du "fun," jé vos l'dirai, allez
Ov lé "personnel," souôs Nièrmont, ès Manchots!
Au but du conte, v'là nos gens radès
A l'abri dé la Tour dé Saint-Aûbin
Et dévant pêtchi, bein rigalès
Dé merveilles et dé gâche - un bouan gobin!
La bouisson ch'tait des "raffraîchissements,"
Notre ammin nos l'dit en deux mots,
N'en doutèz pon - faût être tempéraments,
Quand nou va, souôs Nièrmont, ès manchots!
Les provisions mangies, la pêque quémenchi,
Fallut happer brochettes, sè, et ertrousser ses braies,
Et s'mettre à digotter partout dans l'gravi
Pour trouver "les petits trous tant convoités"!
La pêque fut "mince," mais yieun d'la troupe,
Quoique' i s'est pliaint dé ma' dans l'dos,
A 'tè bein content d'aver d'la soupe
Faite ov' ses chent trente manchots!
Et pour les c'ats? les chiers pétits
Ont y'ieu lus partie du fricot,
Unn raide bouann' bollèe dé baînits
Bouillyis ov la soupe dé manchot!
J.P.
Nouvelle Chronique de Jersey 1/10/1910
|
