|
Quand Chewed-ear Jenkins sé fît marier à Guinneyveer McGee, I l'avait unn' belle têtèe dé qu'veux - pas un seul n'était gris, Mais ov lé temps, les soins du maînage, ou tchiq' aût' chose, jé cré, Les firent touôs disparaître, coumme d'la nai au r'nouvé; Et i n'y'ièn resti pas pus sus sa tête, pour vos l'dire en un mot, Qu'ou n'en trouv'rêtes au plien, sus un gros blianc galot! Guinneyveer et Chewed-ear étaient unn' bein aîmable parre. Jamais entré y'ieux i n'y'iavait d'brit, ou aûtchun tintamarre, Mais quand les vaîsins c'menchirent à s'motchi d's'n'houmme, et, disaient qué ch'tait l'yi Qu'avait pliummè d'maîme lé pouôre Chewed-ear, Guinneyveer sé marrit! Et chutt' nièt-là, ou dît à Jenkins, quand ils 'taient en lus couôchant: -"Man vieux, j'm'en vais té faire tout bé, pour cliôre la bec ès gens, J'ai achatè douze boutillyies dé "Baûme," pout faire ercraître les qu'veûx, Et tu verras qué dans p'tit d'temps, tu pouôrras té fichi d'yieux, Jé t'aîme occuo hardi bein, et jé n'veurt pon té vais d'maîme, Lé "Baûme" les f'ra pousser ossi vite, coumme pliantes dé m'lon souôs frême, La douzaîne y pâss'ra, bein seûre, et pour qué rien n'dèsroute J'té frott'rai tout sus ta bénite tête, jusqu'à la derniè goutte!" - V'là tchi fît lé bouon'houmme rire tout haût, et lé mint dé bouanne humeur: - "Bouann'femme," qu'i dît, "sitôt qué j'en verrai yieun perchi, j'té dounn'rai mille dolleurs!" Etait-che l'idèe des sous tchi la poussait, ou bein était-che l'amour? Car dédpis chutte nièt-là, Chewed-ear n'eût pas dé r'pos - quatre fais par jour La bouann'femme v'nait l'trouver ov sa bouteille, et y'ien enviait unn' esclyichie Drait sus l'haût d'sa tête toute nue, et c'menchait sa frott'tie; Voire, maîme ès ès r'pas, pour montrer coumme oull 'tait aîmable, Ou y'ièn r'pitchait unn' raide bouônne dose, dévant sé mettre à table, Et toutes les nyits ou l'resvillyiait, pour l'arroûser occouo, Mais les fichus qu'veux né s'montraient pon, maûgré san tripôt! Bein seûre, qué d'vant longtemps, dans tout lé vaîsinai, Les gens vinrent à entendre chein qu'Guinneyveer faîsait, Et touôs les siers, au manière dé Club qué l's hoummes avaient par là, I n'faisaient qué dé d'vîser, rire, et dischuter entouôre chounna; Enfin y'ieun dît ès aûtres:- "La p'tite femme travaille bein du sus la tête au vi, Mais ou n'gâgn'ra jâmais ses mille dolleurs, sans tchiq's'uns à y'i'aîdji: Si j'formions unn' Compagnie entré nous, pour prendre l'affaire en main, Nous, jé pouôrrons p't'être en r'parer, si c'h'est qu'ou n'y peut rein? Ch'est unn' spéchulâtion, et pour la shâre à Guinneyveer là d'dans J'l'y dounn'rons chent dolleurs pour c'menchi, - et, j'en gâgn'rons chinq chents! Coumme chounna jé jouorons bein lé vieux - i n'ira pon longtemps nueue-tête, Grâce au Chewed-ear Jenkins Hirsute Propagation Syndicate!" - Unn' drôle dé djabbe coumme chett' là, amusit tant les gens Qué les sous pour stèrter lé Syndicat, furent trouvés dans p'tit d'temps; Un Comitè fut bein vite noummè pour aller vais Guinneyveer, Et l'Président, dans un biaû discours, l'y conti toute l'affaire: L'y, un mio dèscouoragie qu'oprès tout san travâs Sur la vielle nuque à Chewed-ear, et qué les qu'veux n'craissaient pas, Sé fît seûre des chent dolleurs, et entre y'ieûx un' accord fut signè Sus un dotchûment bein arrangi, et solidement scèllé. I happirent sus l'coup, lé vier Chewed-ear, et i' y'i'ôtirent san chapé, I y'i'examinirent sa tête ov des lunettes, et l'èspaisseu d'sa pé, Et chaque membre du Comité s'en fut sièz-l'i content et satisfait, S'vantant à tout lé monde, du succès dé lus projet! I l'achatirent un tâs d'Hairlinne, du Tchatch'em, et pour s'asseûrer dé bein faire, I l'eûrent occuo dé la Graisse d'Ourse, du Rhum, et du Syrot dé Capilaire; Et pis touôs les bénits jours, lé Comité, sans seul'ment y mantchi, V'nait s'exercer, à tour dé bras, sus la tête au pouôre vi; S'i' bryiait, ou voulait s'saûver, i frumaient vite la porte. Et tout à tou' i versaient et frottaient - châtchun dé sa sorte! Lé Syndicat sé trouvit sus l'pi'd dé faire fortunne: Toutes les shâres étaient bein vendues - i n'en restait pus yieunne! Pour Chewed-ear, l'i, i' n'avait qué d'affoller - car Guinneyveer d'san bord, L'y trempait la tête occuo la nièt - ch'tait s'lon sé n'accord, Pourtant, Jenkins sé môtchait d'y'ieûx - maûgrè san triste êtat, Et jurait coumme un perdu sus l'Président, et sus tout l'Syndicat: - "Ou z'avèz biaû y travaillyi, tâs d'idgiots," i lus dîsait, "ma tête restéra tréjous nue, Jé m'fiche dé vous, dé vot frott'tie, et des drogues qu'ou m'vérsèz d'sus!" - Tout coumme, ov touôs ses d'vis, Chewed-ear était un mio gênè Dé crainte qu'i n'y'iarriv'rait malheur par être si bein frottè, Et i s'tâtounnait tréjous la tête lé matin en sé l'vant Pour vais si oull' 'tait ossi finne et blianche coumme lé jour dé d'vant... Jusqu'au terrible jour qu'i mântchi dé s'èsvanni, en r'gardant dans l'mireûx, I vit qué dans la nièt, i y'i'avait cru, unn' deuxième coppe dé qu'veûx! Ses mille dolleurs étaient perdus, et lé Syndicat l's érait! Mais... lus dounner touôs chès sous là? du djiantre, don, s'i lé f'rait! I fît tout d'un coup d'la savounnèe, et sé savounni bel et bein, Et sé râsi l'haût d'la tête jusqu'ache qu'i n'y resti rein: Sans perdre dé temps, ou sans être veu, lé v'là tout drait qu'i file Sièz un' apotitchi qui gardait boutique dé l'aut' but dé la ville, I y'i'achati dé l'Onguent - dé tchi pus fort qué l'Thatch'em ou l'Hairlinne, Et qu'empêchait les qu'veûx dé r'craître, et tuait lus p'tites rachinnes. V'là don la comédie tchi c'menche - et châtchun frottait dé san bord, Mais, la pouque, ôprès tout, d'vait rester au pus fort; Chewed-ear avait biâu tâchi dé stériliser san but d'couënne: Il 'tait tout seu', pouôre corps, à s'battre contre unn' douzaîne! I perdit couôrage à la fin - et pis, s'n'Onguent touôni traître: I n'tuait pas unn' mie les qu'veux - i les faîsait pus tôt craître! "Chutt' fais," s'fît-i, "j'en sis à but, et jé n'peux pus y t'nin, Et sitôt qué j'en érait la chance, jé m'saûvrai hors d'ichin!" Ch'tait chein qu'i fît, tout trantchill'ment, chutt' maîme journèe là, I filit bein loin des soins dé Guinneyveer, et du fichu Syndicat, Unn' plièche ouèqu'i n'counnaissait persounne, et qué persounne né l'counnaissait, I pouvait y laissi craître ses qu'veûx, ma fingre, coumme i voudrait! "Et tchi qu'veûx!" qu'i s'dîsait, en pâssant la mais d'sus, "i craîssent et craîssent, Enfin, faût-y s'en èstounner? i n'lus a pon mantchi d'graisse!" - Lé mireûx qu'i l'avait dans sa chambre, était d'la coummunne sorte, Un tracâs dé p'tite valeur, et pendu drière la porte - Et en r'gardant ses qu'veûx dédans, Chewed-ear eut unn' attaque dé ner's, Ses qu'veûx craîssaient, ch'tait bein vrai, mais i vit qué ses qu'veûx étaient verts! Et Chewed-ear sé r'trouvit dans la minsère - fallait don achet'eu, Mettre unn' pèrruque, ou les teindre, pour les changi d'couleu'! Enfin i crut qué ch'tait unn' punition, pour aver mal agi, Et qu'i f'rait mus dé s'en r'aller, tout d'un coup, drait sièz-l'i Pour payi Guinneyveer, et l'Syndicat, et lus conter coumment I l'avait èsprouvè à les tromper ov sa saletè d'Onguent! Il 'tait tout prêt à s'erpenti, quand dans san vier chervé I l'y vint unn' brave idèe... les shâres du Syndicat... pourtchi pas l's achater?... Lé jour d'ôprès i' r'vint sièz l'i, la tête finnement râsèe, Et i vit qu'les membres du Syndicat paraissaient bein gênès, I faîsaient tous gris minne, et né riaient pon coumme d'amors, Car les shâres avaient baissi, unn' fais lé bouan'houmme hors; Et quand Chewed-ear ervint, la tête occuo nue et bein polie, Ils 'taient prêts à l'y vendre tout - n'importe à tchi prix!... Pour chent dolleurs i l'en r'parit - et, unn' fais qu'i l'en fut l'maître, I virent, pus tard, lé vier malin, laissi touôs ses qu'veûx craître! Et touôs les gens dé Nuggetsville, jusqu'au jour d'annièt, Vos cont'ront la farce au vier Chewed-ear, et coumme lé Syndicat fut jouè! J.P. 1913 "The Baldness of Chewed-ear" Robert W. Service |
Viyiz étout: