|
Ah! que j'men r'grette car j'ai mantchi d'mathié. Combein de fais que j'mé sis ergretteaie, disait Betsey Machon, D'navé pas 'tet chute belle sétheaie là au lanchon, Ah! que j'men r'grette car j'ai mantchi d'mathié un bieau garçon ; Tchi pitchi ! Tchi pitchi! que j'nalli pas avec l'i au lanchon. Yiavait étout notre ancienne p'tite couozeinne Lizabet, Combein de fais, J'pense des chents fais, Qué tréjous où dizet: Mon doux ! mon pèthe! oh! mais il est vrai j'en ait t'y ergret - D'avai paur un rein; pour eunne bagatelle - erfuzet - Chu “nice” jeune homme là qu'était si bé, et pis si dret, Si j'avais 'tet bouanne quand y mé d'mandit d'allé au vraic, Probabliément qui m'en éthait touchit t'chiques patholes et v'la qui sé seait fait. Hélas! tchi yieux qu'il avet. oh! 'mais, comme i' m'aimait, i' m'adoret. Toute ma vie, oh! mais vèthe d'gia, j'en éthait ergret ; Vraiment, chest quazi étonnant que j'nen aie affolet. Ch'est comme notre pouore vieille belle-soeur Nancy Qui r'fusit un mousieu, un “nice” vieir veuvi. Comme ou dit - "ma vie est remplyïei de regrets!” L'un où l'aoutre vos ditha la même chose à peu près Yien a pas bieaucoup qui sont contents de lus sort; Nou peut en trouvé p't'être yieun, mais ch'est quand y dort. 'Ch'est tréjous: "Si chonchein où chonna était Je cçais pus content et bein pus satisfait. Si j'avais deux vies, je f'thais difféthemment, Mais j'éthaies peut faithe pièthe : i' faut que j'sais content. Mes chieirs ammeins ; n'oubliyiez pas que le sien qui gouverne toutes choses Prend un soin particulyi de tous ; sait qui veillent ou qui reposent, Si je n'sommes pas justement chein que j'voudraîmes être, Ch'est tout pour le mus. Où n'lé pensçaies pas peut-être. Chein que je n'savons pas achteu je l'séthons pus tard. Les ecrituthes nos l'disent ch'est pourtchi faut prendre tout d'bouanne part Et pensé que toutes choses qu'arrivent (sçait bouannes ou maouvaises) Sont enviaies pour notre bein quoieque aoutrement y pathaissent. J. P.
|
Viyiz étout: