|
Ph'lip (rencontrant Jimce, et Tom) "Hallo Jimce, hallo Tom, coumm' est qu'ou z'êtes? Ah, qué j'sis don content d'vos vais; Et vos v'là souôs vot' fin, coumme pour un jour dé fête Bouann' câsaque, bouan veste, et vos toutes bouann' braies!" Jimce Et pourtchi pas? Si unn' houmme a dé bouans habits Ch'est pour les mettre sus san co', est-che pon? L'habillement d'un' houmme, s'il a un mio d'avis, Sé fait tréjous a un prix d'raîson... Allèz don en Ville, et au Gâgne Pétit, Ou à la boutique dé Samuel Shaw, Pour vin' chinq ch'lins ou z'érèz un biaû suit, Et ou s'rèz grais du haût-en-bas!" Tom "Ou pour des bottes, allèz don sièz Begh-in, Pour en aver d'bouannes et a bouan marchi, Et i vos baill'ra étout, par dessus l'barguin, Unn' tinnèe d'tchiqchose pour les poli. Nos djiènnes, necktie, not bowleur ou casquette, Ou bein chein qué j'mettons pus près d'not' pé, Ch'n'est pas chounna qui nos viède la pouchette, Ph'lip vos dira tch'est qu'ch'est - bein mus qu'mé!" Ph'lip "Voire djià, jé sais bein tch'est tchi viède la meinne, Quand nou s'a unn' femme et sept filles à maint'ner, Ch'n'est pon ov des 'sunbonnet' ou des robes d'indjienne Qu'n'ou peut les satisfaire ou les contenter. Et pour les chapiaûx qu'i mettent acheteu I sont si mal faits et terribliément grands, Qui faût qu'i saient tréjous ertrimmès à neu'. Ch'est a saver chein qu'i couôtent en plieummes ou ribbans! Si nou s'a, par chance, fait bein sus les patates Est-che nous, les hoummes qu'en avons l'profit? Nennin, les femmes happent les sous, et ch'est achate, achate Tout chein qui lus fait envie siès 'Dé Gruchy' - Et pis ch'est dé s'n'aller vite vais la couôtutière, Ov lus marchandises dé toutes les couleurs, Et pour être à la mode, ou s'mèt à lus faire Des "hobble skirt" ou dé pareilles hôrreurs!" Jimce "L'aut' jour, un "hobble skirt", fut caûse dé hardi d'minsère: Unn' hardelle qui mettait lé sien pour la preûmière fais S'en fut dans l'parleux lé montrer à san père; Quand ou s'mins à marchi, lé bouann'houmme, dé la vais En rit et rit tant, qué lé hitchet l'happi Mal assèz pour l'y touôner san d'dans à l'arbours, Pas moyien dé l'empêchi, et lé pouôre vieux hicq'ti San pouver bère ou mangi, pour un djièzaine dé jours!" Tom "La s'maine pâssèe, nou m'envyit (ch'tait unn' farce, jé l'gage) Un biaû grand livre à portraits des modes dé Paris, Coumme j'n'avais rein à faire, jé l'ouvre, et page sus page, Y'i'avait partout des femmes bein drôllement habillyies: Tchiq's'unn' n'avaient pon grand chose sus l'co, Car chétait d'belles dames en costume dé bain...." (Ichin es deux autres font la minne d'aver honte et Ph'lip crie à Tom:) "Arrête là, Tom, arrête! n'en dis pon un' aut' mot! Tu nos cont'ras chounna quand jé s'rons touôs seu'rs démain! Jé n'os-en allons - ch'est bonsoir, man vieux, Et bonsoir, étout, Mesdames et Messieux!" (I s'en vont) JP |
Viyiz étout: