Les Pages Jèrriaises

Edward Le Brocq

1877-1964

Edward Le Brocq Douard Lé Bro 'tait journaliste en Angliais tchi êcrivait d's articl'yes en Jèrriais redguliéthement pouor bein longtemps.

I' fut né l'10 d'Novembre 1877 à Homestead, Les Augu'thez, Saint Pièrre, septchième fis d'Francis Lé Bro. En 1889 il entrit au Collège Victoria, épis s'en fut travailli parmi l's Êcrivains dans la Rue ès Trais Pigeons. En 1900 i' s'mathyit à Kate Madeline Brayn dé Highfield, Saint Saûveux, et s'mînt à fèrmer pouor eune dgiexaine d'années. Au mais d'Mai 1910 i' d'vînt journaliste auve l'Evening Post, et après d's'années, rédacteu du Morning News.

Lé preunmié neunmétho du Jersey Critic fut publié l'27 d'Août 1921 et cont'nait la preunmié lettre dé Ph'lip dé Portînfé. Pouor la fîn d'sa vie il avait êcrit des chents d'articl'yes dans les gâzettes entouor "Ph'lippe et Mêrrienne".

Sa preunmié femme mouothit duthant l'épidémie d'la grippe en 1918. En 1923 i' s'èrmathyit à Hazel Maud Fauvel, dé Saint Martîn. Il eut quat' mousses auve sa preunmié femme, et trais auve sa deuxième. Missis Lé Bro travaillait en Angliétèrre duthant la Deuxième Dgèrre Mondiale, et auprès la Libéthâtion, Douard Lé Bro s'en fut la r'jouaindre. En 1946 i' r'vînt en Jèrri pouor èrlanchi l'Morning News. Quand chutte gâzette-là freunmit en 1949, i' s'èrtithit coumme journaliste rédgulyi mais continnuait à contribuer d's articl'yes et sustout l's histouaithes dé Ph'lip et Merrienne.

I' mouothit lé 10 d'Avri 1964.

 

Nécrologie d'1964:

 

Edward Le Brocq, fils François
1877-1964

Lé décès du Sieur Douard Lé Bro lé 10 d'avri, dans sa 87e,. nouos prînt iun des hommes les pus connus d'l'Ile - vrai type Jèrriais, bel homme et haut, et drait comme un pitchet, homme dé grand' connaîssances et r'mèrquabl'ye sus bein des sens. Il avait c'menchi sa vie parmi l's Êcrivains, dans la Rue ès Trais Pigeons, pis s'mînt à fèrmer pouor eune dgiexaine d'années. auprès ch'la i' fut journaliste, à c'menchi auve lé pèrsonnel dé l'"Evening Post", et d'vînt pus tard rédacteu du "Morning News", avant étout publié eune autre gâzette pouor bein d's années connue souos l'nom dé "Jersey Critic". Là i' disait ch'tch'i' savait et pensait entouor les affaithes dé l'Île. D'un d'vis franc, rein n'lé dêrangeait! I' d'vînt vraiement fanmeux et tout l'monde lé connaissaient comme "Lé Critic"! Duthant l'Otchupâtion d'l'Île par les Allemands il en fît dé bein des sortes, s'en allant eune volée en Angliétèrre auprès la dgèrre, en travas pouor lé Gouvèrnément, etc. Et pis i' r'vînt pouor èrquémenchi la publyicâtion du "Morning News" (tch'avait cêssi duthant la dgèrre). Comme ch'la, à l'âge dé beintôt 80 ans, il 'tait dév'nu homme dé grande expérience. Il avait resté întérêssi dans la vaque Jèrriaise toute sa vie et fut considéthé pouor bein d's années iun des touos preunmièrs expèrts au sujet, p't-être même lé tout preunmyi.

Né à St. Pièrre, d'eune fanmil'ye St. Pièrraise, mais d'originne vielle St. Ouonnaise, lé Sieur Lé Bro pâlait un mangnifique Jèrriais et fut iun des miyeu' raconteurs, en Jèrriais et en Angliais, sustout comme învité ès chents dînnièrs donnés dans l'Île avaû l's années. Il avait eune mémouaithe mèrveilleuse et un sens d'humour dé campangne comme pèrsonne d'autre.

Ayant dit tou ch'la, i' nouos reste lé r'gret qué nou n'èrliêtha janmais d'autre les articl'yes entouor "Ph'lippe et Mêrrienne, dé Portînfé". I'n 'n'avait êcrit bein seux des chents d'ches articl'yes, en un mangnifique Jèrriais pliein d'întéthêt et d'un style exceptionnel tchi n'appartnait qu'à li-même. I' nouos faîthait rithe ou souôrithe châque sémaine comme pèrsonne d'autre n'éthait peu l'faithe. Sa manniéthe d'êpeler nouot' vielle langue n'était pon des pus solides - i' n'avait dgéthe fait assez d'împortance dé ch'la, sans doute - mais i' prendra cèrtainment sa pliaiche d'honneu parmi les cheins tchi l'ont êcrite, comme raconteux d'preunmié clâsse et Jèrriais d'la vielle trempe.

FLM

 

Viyiz étout:

 

Les Pages Jèrriaises