Moussieu l'Editeu,
"Eh bein," s'fit la Merrienne, quand je r'vint d'la Ville hier, ch'est-à-dithe Jeudi, "tchèsqu'en est ach'teu. Ont-y envié chu projet au royaume des taupes chu coup?"
"Ma fé," j'l'y dit, "pas tout-à-fait, mais bein près. Y'a yeu une longue distchussion sûs un certain articlye, et quand l'Baillyi a mint l'affaithe ès vouaix, vingt-chinq ont voté pour et vingt-quatre contre. La chose est que l'Protchuleux avait dit que si l'article ne passait pas le Projet tait fichu. Et quand l'appel nominal qu'menchi, y'avait chinq Sénateurs pour et chinq contre. Ch'tait l'tou ès membres d'campagne, et la mâjorité taient contre, mais les Députés et l'Connêtablye d'la Ville taient unanimes en faveur et chonna décidit l'affaithe."
"Mais," ou s'fit, "si la campagne tait contre et la Ville pour, comment qu'chonna put s'faithe. A chu compte-là, ch'est la Ville tchi gouverne ach'teu dans l's'Etats. Ch'est la preumié fais qu'j'ai veu chonna, et, man Ph'lip, ch'est mauvais signe. Hélas! ouèsque notre p'tit Jêrri s'en va. Mais crais-tu qu'ch'est fini chutte fais?"
"Pas tout-à-fait," j'l'y dit. "Y'a ocquo hardi d'articlyes à distchuté, épis y n'faut pas oublié qu'à la fîn, quand l'Projet veindre d'vant la Chambre pour la traîsième et dérnie fais, comme dîsait l'bouonhomme Charles Perchard ès vendues aut'fais, l'opposition étha ocquo une chance de renversé tout."
"Et si chonna s'arrive?"
"Si chonna s'arrive," j'l'y dit, "le Comité s'sont forchi d'résigni, et l'Service National s'sa aussi mort comme autchun pouôre balloque tch'y s'trouve dans notre chim'tièthe."
"Si ch'est d'même," ou dit "ch'est ach'teu l'moment pour des reunions d'constituants dans toutes les pâraisses."
Je châtchi la tête. "Une reunion en Ville," j'l'y dit, "ne sérvithait à rain, viyant qu'touos les Députés sont du même avis et qu'même si lûs constituants lûs donnaient un mandat, y n'obëîthaient pas. Et dans la campagne, ouèsque les membres ont prèsque tous voté contre che s'sait pérdre san temps d'convotchi une reunion. Mais y'en a yunne à Saint-Jean asêsé, et je n'sais pas tchèsque le Ph'lip Le Vesconte, tch'a voté pour s'en va faithe. Ch'est prèsque seux tch'il étha un mandat d'voté contre la préchaine fais, mais, étant membre du Comité d'la D'fense, je n'vais pas comment tch'y peut faithe chonna."
La Merrienne considéthit. "Sûs un sens, ch'est vrai assez, car un homme dait être loyal, mais y n'faut pas oublié qu'ses constituants sont les gens tch'y l'ont mint là, et y lûs dait tchiquechose étout. Un mandat, après tout, est un mandat."
"Vèthe, sans doute," j'l'y dit, "mais j'n'en ai janmais approuvé pûs qu'chonna mé, d'chais mandats. Si les pâraissiens ont assez d'confiance dans un homme pour le mettre dans l's'Etats comme lûs Député, y dév'thaient avé assez d'confiance dans s'n'intélligence et san jugement pour le laissi trantchille quand il est tchéstchon d'voté d'un bord ou d'l'autre dans la Chambre, autrement aussi bein y'envié un choutchet ou un trout-d'chour.
"Epis," j'continuit, "prèsque tréjous, n'y'a pas l'quart des êlécteurs tch'y s'trouvent à une reunion d'constituents, et ch'est bein du si un Député est forchi d'voté accordant à la volonté de tchiques doûzaines. Dans man temps ch'est a dithe quand j'tais jeune nou n'entendait pas paslé d'chais mandats. Un Député voté comme y voulait et personne n'en n'tait d'pièthe. Si, dans chu temps-là nous avait tâchi de qu'mandé un Député d'la sorte, y vos éthait bétôt dit d'allé vos couochi, et il éthait yeu raison."
"J'n'avons jamais accordé sûs chu point-là," ou s'fit, "mais y faut qu'j'admette que y'a tchiquechose dans chein qu'tu dis. Avec chonna, n'oublie pas que quand un homme est êlu Deputé y promet à ses pâraissiens tch'il obëitha tréjous un mandat."
"Vèthe," j'l'y dit, "et ben souvent y veint à vais tch'il avait agi comme un imbécile. Ch'est une chose que bein seux, j'n'éthais jamais fait."
"Nan," ou dit, "car tu'as tréjous voulu avé la tête. Tu n'est pas Saint-Ouennais pour rain."
"Et voudras-tu m'changi?" j'l'y d'mandit.
"Nânin, Ph'lip," ou raiponnit, "il est vrai qu'tu'es têtoigne comme une mule, mais ch'est la natuthe de la bête, et p't'être que j's'y un mio d'même étout."
Ph'lip
13/2/1954
Viyiz étout: