À Portinfé
Saint Ou
Moussieu l'Editeu,
Les fermiers dé Jêrri ont tréjous dit qu'nou p'peut pas aver trop d'mouolliétuthe d'vant Noué, mais qu'après chonna la têrre n'en veur pas. Eh bein, je qu'menche à craithe qu'la Merrienne avait raison, la s'maine pâssée quand ou dit que même les saisons avaient changi dépis que j'tiomes mousses, parce qué touos les jours, après tchiques heuthes de sé, i' r'veint de fortes achies, et y'a pûs d'mathes que jamais. Ch'n'est qu'du pité partout, et ma pouôre bordeuse, que j'avais yeu idée d'plianter yun d'chais jours est dans un triste êtat et je n'pouôrrais pas y touchi pour des s'maines si l'temps n'change pas.
Mais enfin, Moussieu, si y'a un mio d'minsèthe siez-nous, y'a étout d'la jouaie car, comme dit la Merrienne, Saint Ou r'est en vie, et y'a tout espéthance qu'a l'av'nin ou r'prendra sa plyièce comme la pûs importante pâraisse dé l'Ile. J'avons dormi pour une pôse, mais nos v'là rêvillyis, et pour dé bon, grâce au Sénateur Farley, car ch'est li et san projet de transporter la sâleté tch'i' fabriquait à Bellozanne tch'ont totalement changi la situâtion ouèsque la pâraisse est concernée.
En pâslant hier au sé, la Merrienne eut hardi à dithe dé chein tch'avait 'té décidé dans l's Etats. "La Post", ou qu'menchit, "pathait craithe que souos l'nouvel arrangement tout itha bein, mais, entre nous, Ph'lip, je n'peux pas l'vaie."
"Damne, Merrienne," j'li dis, "ni mé ni-n'tout. I' pathait que les fermiers tchi veulent chu composte n'ont qu'à v'nin à Bellozanne pour lé transporter à lûs fermes, sans péyi un sou pour. Mais l'odeu restétha à Bellozanne, et sans autchune doute, y'en étha étout sûs les fermes. Si j'comprends l'affaithe comme i' faut, nou n'pouôrra pas s'en faithe servi pour des s'maines de peux d'empouâisoner la têrre, et ch'est seux et cèrtain tch'il en restétha des quantités à Bellozanne pour infecter tout l'district."
Le Sénateur Farley a promint que l'odeu dispathaitra dans p'tit d'temps," ou s'fit.
"Véthe," j'm'accordis, "mais ch'n'est pas la preunmiée fais tch'il a dit chonna, et l'odeu est ocquo là. Il est v'nu des experts d'Anglyiétêrre pour vaie tchèsqu'i' pouvaient faithe pour amender les choses, mais i'n'ont pas réussi, et dans m'n opinion Bellozanne et tout l'district d'la Preunmiée Tour sont condamnés à enduther ch't'infection-là pour des années, p't'être pour tréjours."
"I faut feliciter lé John Le Merquand, tchi pâslit si bein contre lé projet du Sénateur Farley, et tchi propôsit le plian que l's Etats acceptitent avec une si forte mâjorité," ou s'fit.
"Eh bein, Merrienne," j'li dis "sûs chu point-là j'm'en vais te pôser une tchestchion."
"Et tchèsque ch'est?" ou d'mandit.
"Tu'as liut lé long rapport de san discours dans la 'Post'?"
"Vèthe," ou raiponnit.
"Et en as-tu comprint la maintchi ou même lé quart?"
La bouonnefemme hésitit, et pis après tchiques moments, oulle admint que y'avait hardi d'choses qu'on n'avait pas yeu assez d'intelligence pour comprendre. "Tu sais, Ph'lip té et mé, j'n'avons pas 'te êdutchis comme les gens d'à ch'teu."
"Et j'n'en sommes p't'être pas d'piéthe," j'li dis. "Au mains quand j'avons tchiquechose à dithe, je l'disons dans tchiques patholes que tout l'monde peuvent comprendre, et j'arrêtons là. Mais ch'n'est pas là la mode à ch'teu. Lé John Lé Merquand d'vait bein saver du tout qu'mench'ment que la mâjorité d'la Chambre 'tait d'san côté, et il éthait peut en fini dans djais minutes."
"I' voulait prouver que l'Sieur Farley avait yeu tort du tout qu'mench'ment," ou s'fit.
"Ch'tait nos dithe chein que j'savions déjà," j'li dis. "I' s'mint à capuchi un bidet tchi 'tait déjà mort. Enfin, tout est trantchille pour lé moment, et i' faut espether tchi restétha d'même, mais j'en doute hardi. A ch'teu," j'li dis, "as-tu veu que l'Député Sowden a r'considéther sa décision de résigner et tch'il est content pour lé moment de n'être pas membre du Comite des Louogements?."
"Oui," ou dit, "mais j'n'ai jamais comprint pourtchi qu'après aver yeu tant d'youaix dans son district, i' voulait abandonner l'affaithe, et n'aver rein d'autre à faithe avec les Etats. J'avais tréjous creu qu'un homme 'tait êlu comme membre des Etats et non pas comme membre d'autchun comité spécialement. J'pense bein que dans m'n inouothance j'avais tort."
"Pas du tout, Merrienne," j'li dis, "tu'avais raison. Ch'est la preunmiée fais que chonna s'est arrivé, et nous espèthe que ché s'sa la draine. Si un candidat pouvait chouaisi san comité i'n'y'éthait ni ordre, ni dignité, dans la Chambre. La mêprinse que l'Député fit ch'tait d'craithe tch'i' pouvait faithe comme i' voulait. A ch'teu il a yeu sa leçon et chonna n'li f'tha pas d'ma. Il est ocquo jeune et bein intelligent, et nou peut s'fier tch'i' ne r'fétha pas d'pathelles bêtises à l'av'nin. Il a fait un mauvais qu'menchment, mais il a fait étout l'amende honorablye et tout dait être oublié et pardonné."
"Changeant d'sujet, Ph'lip," ou s'fit un mio pûs tard, "as-tu ouï qu'un certain Député d'la Ville s'en va propôser une taxe sûs les vièrs garcons?"
"Est-i' mathié" j'li dmandis, en riant.
"Oui," ou dit, "et sans doute il est jaloux d'autchun homme tchi n'a pas yeu l'couothage de faithe la même chose. J'approuve hardi de ch't'idée-là, mé."
"Et approuv'thais-tu étout d'une taxe sûs les vielles-filles?"
"Bein seux qu'nennin," ou raiponnit, "car ch'n'est pas d'lûs faute. I' voudraient bein aver trouvé des hommes à lus mathier, mais i' n'ont pas peut les trouver."
"Chein tchi prouve, ma chièthe," j'li dis, "que touos l's hommes ne sont pas des imbéciles."
Ph'lip
Viyiz étout: