Moussieu l'Editeu,
'As tu veu dans la gâzette' s'fit la Merrienne l'autre sé 'qu'y'en a yun tchi veur dithe que Jêrri s'sait ben mûs sans touos ches môteurs et tchi dev'thaient être abolis?'
'Oui' je l'y dit 'j'ai liut chu niolin-là. Touos les fôs n'sont pas à l'âsile.'
'Eh ben' je n'sais pas qu'ch'est du gniolin' ou dit. 'Auprès tout nou pouvé s'grais sans tout chenna y'a chinquante ans. Nou n'allait pas si vite, mais nous arrivait quand même. Epis y'avait du pliasi à cachi un bouon bidet. Té r'souvains-tu d'notre gris ch'va, le Bob, tchi nos portait dans l'quârre jusqu'en ville dans trais-quarts d'heuthe? Il est vrai tchi faisait des êcarts, et tch'il avait la mauvaise habitude de l'vé l'drièthe, mais n'y'avait pas un bidet dans l'Ouêst tchi pouvait l'passé sûs le route.'
'P't'être ben' je l'y dit, 'mais ch'tait eune vilaine bête et j'fut ben content quand l'bouonnehomme Lambert le print en êxchange pour sa vieille nèthe jument.'
'Ch'tait eune quédole chaitte-là' dit Merrienne. 'Le preumié sam'di que j'nos en fûmes en ville auvec lyi ou choppit en d'vallant l'mont d'Biaumont et rompit les limons. Mé j'fut fliantchie dans la route et j'n'eut que de m'rompre l'co. La préchaine fais, la tchéthoigne print l'mors ès dents et nos versit en appréchant la Crouaix au Lion. Ah, damme vèthe, tu fit un bouon bardgin quand tu'am'nit ch't'anima-là dans l'êtablye.'
'Sans doute' je l'y dit ' ou n'tait pas tréjous trop qu'mode, mais n'y'avait pas miyeu au câgnon quand v'nait les grandes tchéthues. Auvec chenna, donne mé un môteur toutes les fais. Au mains nou peut s'faithe seux tchi n'chop'tha pon, tchi n'lév'tha pon l'drièthe et tchi n'vos versétha pas pour ben qu'nou prenne des précauttions et qu'nou n'cache pas trop vite. Auvec un bidet nou n'est jamais en seûzeté d'sa vie, mais avec un môteur n'y'a autchun dangi et si les tomates paient ch't'année, j'ai idée d'en accaté yun pourvu que l'vendeur me faiche crédit pour eune pôse.'
'Tu f'thais comme du voudras' dit Merrienne 'mais j'te guérnis qu't'ithas tout seu dans tan môteur. Il est vrai que j'qu'menche à vieilli, mais j'voudrais ocquo vivre tchiques années et quand m'n'euthe veindra, j'éspèthe de mouothi dans man liet et pas à l'hopita, auvec trais ou quatre docteurs à m'gavachi comme y font à tout l'monde au jour d'anniet auprès un accident mortel.'
'Il est vrai tch'ils ont print ch't'habitude-là' je l'y dit, 'mais n'te gène pon. Je n'éthait pas d'accidents car n'y'a rein pûs aisi à cachi qu'un môteur. Autchun imbécile peut l'faithe.'
'Ch'n'est pas là man opinion' dit Merrienne. 'Sans doute tu crai qu'nou n'a qu'à crié wog ou bidaway et qu'la machine touôn'na à drouaite ou à gauche comme un g'va tch'a tait ben duit, mais tu t'trompe. Le jour que tu'accat'tas chu môteur j'ithai faithe des'arrangements auvec un entrepreneux pour un éntêrrement tchi n'couôt'ta pas trop chi. Et pas un autre mot, si t'pliait.'
PH'LIP
14/5/1949
Viyiz étout: