Au Portinfé.
Moussieu l'Editeu,
Dépis la s'maine pâssée tout a tait assez trantchille siez-nous. Il est vrai qu'la Merrienne n'est pas tréjous si obligeante comme ou dev'thait y'être, par éxembplye, j'ai une djobbe à la faithe se l'vé au matin pour m'apporté une tâsse de tais, et ou r'fûse absolûment de nétti mes bottes quand j'voudrais sorti pour allé vais tchique vaisin, mais autrement ou n'se comporte pas mal et, entre nous, Merrienne, j'pouôrrais avé pièthe.
L'autre sé, ayant veu sûs la gâzette le portrait d'la hardelle tch'a tait chouâisie pour représenté l'île à la Bataille de Flieurs, ou m'dit qu'iou n'en criyait pas grand'chose, et qu'oulle en connaissait yunne dans l'bas d'l'Eta tch'y valait bein mûs. "Sans doute," ou dit, "ou va au vraic par bordée, et ses chabots sont grands comme des p'tits batiaux, mais ch'est une bouonne grôsse hardélle ch'y f'tha une rare mèthe de famille pûs tard, et tch'y nos f'thait crédit, nous ichin à Saint-Ou. Tchèsque tu'en dis, Ph'lip?"
"Chein qu'j'en dis, ma vieille," j'l'y raiponnit, "ch'est que quand j'avais djais-huit ans ou d'même y'avait une rouoge-tête dans les fonds du Creux Baillot que j'n'éthais pas êchangi pour une doûzaine comme chette-là dans l'papi. Malheutheusement, oulle avait trop d'galants, et toutes les s'maines j'tais en dangi d'atrapé une slingeuse. Memée tch'éthait freumé la porte au nez à l'Archange Gabriel, s'il avait yeu des rouoges chéveux, mint san pid bas quand vint un temps, et la hardéllle fichit san camp avec un soudard tch'y s'n'allait dans l's'Indes, laissant sa femme et chinq ou siez mousses drièthe l'y."
Après chonna, Moussieu, la bouonnefemme se mont à pâslé d'chein que l'Sieur Ahyi, l'Connêtablye de Saint-Martin, avait dit à la rêunion d'ses Principaux et Officiers. "J's'y bein contente de savé," ou qu'menchit, "que y'a ocquo dans l'Ile une pâraisse tch'y peut s'graie sans les sérvices de la police salariée. Et, si Saint-Martin peut l'faithe, pourtchi pas l's'autres? Pourtchi pas, par éxemplye, nous ichin à Saint-Ou?"
J'eut à souorithe, Moussieu. "Ma pouôre Merrienne," j'l'y dit, "y n'faut pas prendre chein que l'Connêtablye dit trop sérieusement. Est-che que tu n'as pas veu dans la gâzette les rapports de cértains causes d'vant la P'tite Cour ouèsque la police de la pâraisse adméttait volontaithement qu'oulle avait yeu l'assistance de yun ou pûs d'chais detectives? Crais-mé s'tu veur, mais au jour d'agniet, y n'y'a pas une paraisse dans l'Ile tch'y peut s'pâssé d'la Police Salariée."
"Pourtant," ou dit, "y n'y'avait pas ditet quand man grand' pèthe était yun des Chantgniers de la paraisse."
"Nan, bein seux," j'l'y dit, "mais étout dans chu temps-là n'y'avait pas les malfaiteurs tch'y y'a ach'teu. Et quant à tan grand'pèthe, j'ai ouï dithe tch'y n'présentit pas une seule cause dans l'couothant d'ses deux tèrmes."
"Ch'n'est pas vrai," ou s'fit. "Il en présentit yun pour avé battu sa femme, et l'Juge Gibaut y'en donnit pour un mais en bouaite."
"Vèthe," j'l'y dit, "et l'brit couothait dans la pâraisse que tan grand'pèthe print bouon soin duthant chu mais-là qu'ou ne s'sait pas sans consolâtion."
J'éthais peut en dithe pûs long, Moussieu, mais je n'voulais pas irrité la Merrienne, car j'pensit à ma tâsse de tais et à mes bottes, chêstentchi, j'm'emprêssit de changi l'sujet et j'l'y d'mandit s'oulle avait r'mértchit le drôle de jugement à la P'tite Cour ensouivant une collision à Croix Câtelain, Grouville.
"Oui," ou dit, "et j'trouvit chonna un mio drole. Le Juge vint à la conclusion qu'les deux conducteurs avaient fait tout ch'qu'ils éthaient deu faithe, et tch'y n'taient pas à bliaumé, ni yun ni l'autre, pour l'accident. Mais si y'avait yeu tchique pérsonne de tuée, tchèsqu'en éthait tait?"
J'l'y dit que je n'savais pas, mais que j'donn'nais quatre sous pour avé l'opinion du Chantgni tch'y présentit la cause de chu jugement. "Ach'teu, Merrienne," j'ajouotit, "une bouochie n'me f'thait pas d'ma d'vant ramonté, mais j'voudrais que tu m'dithais, en prépathant tchiquechose tchèsque tu crai de chein qu'notre nouviau Doyen dit y'a un jour ou deux. Y voudrait d'neuves eglyîses, car y crait que Jêrri n'en a pas assez."
Ou se l'vit d'sa tchaise pour mettre san d'vanté. "Si ch'est-là vraiement s'n'opinion, après avé tait ichin à-bein-près chinq minutes," ou dit, "j'l'y doun'nais en avis de s'mettre à trouvé des moyens pour remplyi les eglyîses que j'avons ach'teu. Quant il étha fait chonna, y pouôrra pâslé d'en bâti d'neuves."
Et, Moussieu, ou s'mint à fricachi du gras lard avec des oignons.
Ph'lip
Les Chroniques de Jersey 25/7/1959
Viyiz étout: