Moussieu l'Editeu,
Lundi au sé yun d'nos vaisins vint siez nous pour me d'mandé si j'pouvais y'êpêgny un mio d'êtrain. Y n'avait pas yeu l'temps d'allé ès vendues, et il avait une idée que j'en avais prèsque trop dans l'solyi. J'nos arrangîmes tout-d'suite, et, la Merrienne y'ayant offert en p'tit vêrre de san vin d'rhubarbe, y s'assit en d'vant du feu, et j'nos mîmes à convèrsé.
Il avait bu à notre santé, et mé j'avais dit "A la tcheinne, man Tom," quand la Merrienne, ayant mint un choutchét sûs l'feu, dit comme chonna: "Eh bein, mé, j'vos souhaite un bouon Nouë, vaisin, et, si je n'vos viyais pas dans l'entretemps, une bouonne année."
"Mercie, Missis," y dit. "Quant à une bouonne année, j'en ai grand besoin, car j'pliantit trop tard au r'nouvé, et j'n'eut pas les hauts prix, mais, pour dithe vrai, je s'sait bein content quand Nouë s'sa pâssé."
"Oh!" ou dit, "et pourtchi?"
"Pour pûs d'une raison," y dit, "A qu'menchi, nou dêpense tréjous trop d'sous à Nouë. Sam'di, par exemplye, ma femme s'en fut en ville avec une djaixaine de louis, et ou r'vint la pouchétte viède. Oulle avait accaté toutes sortes d'choses - un cravatte de toutes les couleurs pour san bouonhomme de pèthe, tch'est à maintchi en êfange; une pathe de cauches de souaie pour sa mèthe, tch'y ne tcheint pas d'but; des jouéttes pour les mousses, des chucrins, du chocolat, et d'autres ramâs'sies tchi n'sérvent à rain. Y'avait tchiquechose pour mé étaut, mais je n's'y pas pour l'avé d'vant l'matin d'Nouë. L'année passée ch'tait des cigaréttes, et mé tch'y fume une pipe. Chutte fait che s'sa san doute une quéminse tchi s'sa ou trop grande ou trop p'tite, et ou ditha qu'oulle a r'grét, mais qu'ou pouôrra faithe pour yun des garçons. Oulle est d'même, ma femme; ou n'a autchune idée.
"Epis," y continuit, "le jour de Nouë y'étha un picot sûs la tablye et un gigot d'lard et du podin tchi m'donn'na l'mal-au-ventre pour le restant du jour. Nou mange'gea trais fais pûs que d'couôtume, et quand veindra l'sé y faudra s'méttre à jouë toutes sortes de bêtes de gammes pour amûsé les mousses. L'année passée, j'me donnit un blackeye en jouant à caffou et j'n'eut que d'me rompre une game quand je m'trébutchi en gaffant l'piano criyant que ch'tait la sérvante."
J'nos mîmes à rithe, la Merrienne et mé. "Ou n'est pûs ôv vous, chutte sérvante-là?" d'mandit la Merrienne.
"Nan," y dit, "la Missis la mint à la porte tôt après. J'n'ai jamais seu pourtchi."
"J'pouorrais p't'être vos l'dithe," fit la Merrienne séquement, "mais ch'n'est pas tout chonna. Ou dites qu'ou n'aimez pas l'jour de Nouë, mais étious de ch't'avis-là y'a quarante ans quand ous alliez à l'êcole?"
Le Tom hallit sûs sa pipe une fais ou deux. "Eh bein, nânin," y dit, "car j'tais mousse, et pour nous les p'tits, y faut adméttre que ch'tait un grand jour. Mais ch'est difféthent ach'teu."
"Pour vous p't'être bein," ou dit, "mais vos êfants, tchèsqu'ils en disent de Nouë?"
"Oh, damme!" y dit, "chais jours y n'pensent qu'à chonna. Même agniet, la p'tite Sophie m'a d'mandé si Father Christmas veindra comme de couôtume."
"Et tchèsqu'ou y'avez dit?"
Y s'grattit la tête et s'mint à souôrithe. "Ma fé!" y s'fit, "J'éthais deu l'y dithe que l'vier barbu qu'ou vêrra la séthée de Nouë tappé à la f'nêtre, s'sa san pèthe dêguisé, mais j'n'ai pas voulu la d's'appointé, et don j'l'ai asseuthée tch'y veindra comme y fait touos l's'ans. Après tout, quand nous a des mousses y n'faut pas les rendre malheutheux."
"La!" s'fit la Merrienne, "je l'savais. Ou faites la mine d'être un roupilleux, mais j'vos ai tréjous connu comme un vrai Saint-Ouennais et un homme de bouon tchoeu. Quand veint Nouë y faut pensé ès p'tiots, et en les viyant heutheux nous est heutheux nous est heutheux sé-mêmes. J'voudrais gagi que si j'entrais siez-vous la séthée d'Nouë, j'vos trouv'thais à joué ocquo à caffou."
Y se l'vit pour s'en r'allé. "Eh bein, v'nez, Missis," y dit, "et man nom n'est pon chein tch'il est si je n'vos attrape pas pour vos embréchi."
"J'voudrais vos y vais," s'fit la Merrienne, mais j'viyais quandmême que l'compliement n'y'avait pas dêpliut.
Ph'lip
Les Chroniques de Jersey 19/12/1953
Viyiz étout: