Les Pages Jèrriaises

Le service militaire

Distchusion au Portinfé

Moussieu l'Editeu,

Chu temps ichin ne nos va pas. La Merrienne est tréjous à s'pliaindre de ses cors et d'ses r'frédeuses, et quant à mé, une fais qu'j'ai soigni les bêtes après l'tais, je m'dêpêche de m'appréchi du feu. Heutheusement, j'avons tout-pliens d'bouais, car y'a deux ou trais mais j'abbatit tchiques viers pommiers, du Rom'thi et du Nier Binet, tchi n'valait pûs rain.

Alors, hier au sé, la Merrienne, assîse d'l'autre bord du feu, voulit s'mettre à conversé. Comme toutes les femmes, ou n'peut pas résté trantchille bein longtemps. Mé, j'tais content d'fumé ma pipe et de r'gardé les portraits que nou peut tréjous vais dans l'feu si nous a un mio d'imâgination.

"Ph'lip," ou qu'menchit, "je vait que l's'Etats s'en vont r'quemenchi dans tchiques jours. As-tu autchune idée tchèsqu'ils ont idée d'faithe?"

"Ma fé!" j'l'y dit, "pas pûs qu'chonna, mais nou peut être seux que quand veindra l'mais d'Avri, et que l'Baillyi, comme de couôtume lûs donn'na sa bénédiction, ben content d'les vais fichu lûs camp pour une pôse, y n'éthont pas fait grand-chose de bon, ils ethont fait hardi d'bêtises, et ils ethont laissi tout-plien d'travas pour pûs tard. Ch'est chonna tchi s'arrive tréjous d'nos jours, et j'n'ai autchune raison d'craithe que nou vêrra grand' difféthence chutte fais."

"Mais," ou dit, "nou m'a asseuthé que l'Projet au sujet du service militaire s'en va v'nin d'vant la Chambre, et qu'si pâsse nos garçons éthont à allé en Angliéterre pour une couple d'années. Crai-tu qu'ch'est vrai?"

"Oui," j'l'y dit, "pûs qu'probablye, mais bein seux qu'y'étha d'l'oppôsition. Ichin à Saint-Ou, par exemplye, y'étha du brit si l's'Etats passent chu projet-là, et dans d'autres pâraisses étout."

"J'l'éspèthe," ou s'fit, "car che s'sait une nèthe honte si nos garçons taient enviés hors l'île. Est-che tch'y n'peuvent pas faithe lûs service ichin? Et pourtchi en faithe du tout. Dans les viers temps nou n'entendait pas chu gniolin-là."

"P't'être bein, Merrienne," j'l'y dit, "mais n'oublie pas qu'dans les viers temps j'avions notre noblye milice, avec des sergents et des corpothaux, et qu'tout Jêrriais tait forchi d'servi et d'apprendre à tithé drait. Mais au jour d'agniet n'y'a rain, et quant à mé, j'm'en vais te l'dithe franchement, j'ai dans l'idée qu'un couplye d'année hors l'île ne f'thait pas d'ma à nos jeunes garçons. Ils apprendrais bein des choses tch'y n'apprendront jamais ichin."

"Oh, quant à chonna, j'n'en doute pas," ou dit. "Ils apprendraient à bèthe, à couôre les hardélles et à craithe qu'un piércheux tait aussi bouon comme un travailleux. Le fils d'un férmyi, par exemplye, crai-tu qu'après deux ans à rain-n'faithe y voudrait se r'mettre à traithe les vaques et nétti l's'êtablyes sans pâslé d'êtendre le fumyi dans l'clios et d'tchithié l'êpu sûs l'herbe? Jamais d'ta vie!"

"Ch'est accordant," j'l'y dit. "Un bouon garçon duit au travâs n'oublietha pas dans l'couothant d'deux ans chin tch'il a apprint, et y s'y r'mettra du preumié jour. Quant ès autres, ch'n'est pas la peine de s'en gèné. La piupart trouv'thant tchique sorte d'djobbe en Angliéterre, et nou n'les manq'tha pas ichîn."

"Et pourtant," ou s'fit sévèthement, "tu n'tais pas de ch't'idée la y'a deux ou trais ans. Tu dîsais à tout-l'monde que pûstôt que d'vais nos garçons s'en allé tu dêpendrais le vier boucagni tch'appartenait à tan grand'pèthe pour mettre une livre ou deux d'piomb dans l'ventre d'autchun tch'y veindrait dans la pâraisse pour les enrôlé. Estche-pas vrai?"

"Oui, Merrienne," j'l'y dît, "mais tchiquefais nou peut changi d'opinion. Enfin, ma fille, ne t'gène pas, car je s'y pérsuadé que quand l'Projet s'sa présenté y s'sa bétôt envié au royaume des taupes."

"En-es tu bain seux?" ou d'mandit.

"Dans chu monde," j'l'y dit, "nou n'dait pas être trop seux d'autchune-chose, mais j's'y prêt à gagi ma miyeu vaque contre une chivièthe-à-bras, que jamais tu n'verras un seul de nos garçons tchitté l'Ile pour faithe san sérvice militaire en Angliétèrre."

Ph'lip
10/1/1953
 

Viyiz étout:

 

Les Pages Jèrriaises