Moussieu l'Editeu,
La niet passée j'criyais vraiement que la Merrienne avait affolé. Trais ou quatre fais dans les p'tites heuthes oulle a sauté hors du liet, allumé la chandelle et s'est défaite de tout ch'qu'oulle avait sus l'co. Mé, j'faisais la mine dé ronflier, car je n'voulais pas pûs qu'chenna r'garder chu commerce-là. Ou comprendez, Moussieu, que y a des moments dans la vie quand un homme dait freunmer l's ièrs à chein tchi s'pâsse.
En dêjeunant ou ma explitchit qu'oulle avait 'té pitchie par iun de ches sales p'tites bêtes que j'n'ai pas besoin d'nommer.
'Ch'est drôle, Ph'lip' oulle a dit, 'mais quand n'y éthait que iun de ches maufaites insectes dans tout l'Ile, ou veindrait m'trouver ichin. Toute ma vie j'en ai souffert et j'voudrais saver pourtchi. Chein tchi m'fait mârri ch'est dé t'vaie dormi comme un prince et ronflié à tout câssé, quand mé, j'si à enduther des tortuthes. I' n'y a pas d'justice dans l'monde!'
J'n'ai pas ôsé rithe, Moussieu, car si j'l'avais fait, seux et certain que j'éthais yeu tchiquechose à travers la tête. Et don, ayant toussoté un couplye d'fais, et avalé une gorgie d'thée, j'ai d'mandé à la bouonnefemme s'ou n'criyait pas que y'avait yeu un grand changement à la P'tite Cour.
'Mais damme oui' oulle a dit, 'ch'est l'Juge Vouaisin tch'a changi. Ch'nest pûs une affaithe d'une p'tite amende, ou d'vingt-quatre heuthes dé prison, mais d'un mais ou même pûs. Jé crai tch'i' dait aver yeu daeux mots avec lé Juge Syvret et d'en aver profié et ch'est une raide bouonne chose. Pâslant d'chenna, Ph'lip, tchèsque nou lûs donne à mangi à ches brigands dans la Prison, sais-tu?'
'Nannin' j'y ai dit, 'mais si ch'tait mé, j'les mettrais sus du pain et d'ieau, avec une raide dose d'huile d'casto trais fais la s'maine, et j'garantis qu'au but d'lûs terme, ils éthaient bein d'la peine à sé t'nin d'but, et prendraient bouon soin de né r'v'nin pas pour un deuxieme.'
'Un raide bouon r'miède' ou s'est accordée et ajouotit, 'j'm'en vais en pâsler à notre Député, pour tchi souôslève la tchestion dans l's Etats. S'ils en approuvent,et qu'la Police trouve un deuxième tchan comme lé raide bouon tch'ils ont àch'teu, la Ville, au sé, s'sa si trantchille qué nous pouorrait craithe que tout l'monde 'taient hors à la chapelle ou à une rêunion dé ches 'Jehovah Witnesses'.'
'Laisse ches-là trantchilles' j'y ai dit. 'Ils ont p't-étre dé drôles d'idées, mais ch'est d'bouonnes gens et I' n'font pas d'ma.'
'Comme tu voudras' oulle a dit 'mais y a iunne ou deux observâtions que j'éthais peut faithe. Enfin, une autre chose: tu'as veu, sans doute, dans la gâzette, qu'un Sénateur eut un accident dans san moteur, l'autre sé, à Saint Brélade.'
'Vèthe' j'ai dit 'en tâchant dé touôner une cârre, i' capuchit la banque et la Police fut app'lée.'
'Et la Police trouvit tchi n'tait pas à bliaumer et i' n'fut pas même d'vant l'Connétablye.'
'Nan.'
'Bouonne Police à Saint Brélade!' ou s'est faite, séquement.
'Et tchèsque tu veur dithe par chenna, bouonnefemme?'
'Oh, rein du tout. Ch'est simplyement une idée tchi m'est v'nue à la tête.'
'Eh bein vielle têtoine' tchèsqu'oulle est ch't'idée-là?'
'J'n'té dithait pas anniet, mais p't-être pûs tard. Laissons l'Sénateur et la bouonne Police et considéthons àch'teu ocquo une autre chose qué j'ai veu dans la gâzette derniéthement. Ch'tait l'avis d'une rêunion des crêances d'un individu tch'est en d'sastre.'
'Eh bein mais' j'ai dit, 'ch'n'est pas l'preunmyi tchi s'est trouvé souos l'fou et seux et certain ch'né s'sa pas l'drein.'
'Oh' ou s'est faite, 'j'sais bein qué dans l'pâssé bein des pouôres balloques ont yeu le même malheur, mais i' m'semblye qu'anniet i' s'arrive dé bein drôles dé choses en Jêrri. Par chein qu'j'en vais, un homme peut s'en v'nin ichin, prendre une boutique et s'êtablyi en commerce sans aver dèpensé un sou. Tout ch'qui li faut y'est fourni à crédit, même à la valeur dé dix milles louis épis un bouon jour lé moussieu est décliathé en d'sastre et les créanciers sont liaissis à compter lûs pertes et à tâchi dé comprendre comment tch'ils avaient peut être si bête. J'n'dis pas qué ch'est d'même dans la présente cause, mais d'pis la dguêrre il a 'té fait plusiers fais.'
'Damme, vèthe' j'ai dit, 'et pourtant si un bouon Jèrriais y êprouvait I'n'trouv'thait pas les gens si prêts à li donner crédit. R'garde mé, quand j'fus en Ville i'n'y a pas, longtemps, et qu' jé m'trouvis à court, j'eus bein d'la peine à persuader un aubèrgiste à m'donner crédit pour une pinte de biéthe et l'balloque mé connaissait, pourtant.'
'Ch'tait p't-être pour chenna' oulle a dit, 'mais tu'as raison, Ph'lip. J'éthais creu que j'tais bein connue en Ville étout, mais dans les temps d'Noué, quand j'fus dans iun des grandes boutiques pour accater une pathe dé n'y a pas soin tchi à crédit, j'éthais yeu à m'en r'v'nin sans sinon pour la Liza, tch'était auve mé. Tu peux t'fier qué j'n'y r'mettrait jamais les pids dans chutte boutique-là, mais si j'avais 'té une dame angliaiche, avec un môteur tchi n'y appartenait pas, accompagnée par un moussieu tchi n'tait pas s'n homme, j'éthais peut aver tout ch'que y'avait dans la boutique sans dêshaller un sou. Ch'est abominablye, Ph'lip!'
'Y a bein des choses dans l'Jèrri d'àchteu tchi sont abominablye' j'ai dit. 'Mais àchteu Merrienne, tan membre des Etats tchi voulait aller en Russie, est-i' ocquo d'la même idée?'
'J'n'si pas seuze' oulle a raiponnit, ' car il a p't-être considéthé que si les Russes happaient un grand fort gars comme li dans lûs pays, i' pourraient décider qué ch'est là justement l'homme tchi lûs faut pour les mines en Sibérie.'
2 JULY 1960
Viyiz étout: